Tetovë, 8 tetor - Partia Demokratike Shqiptare Dega - Tearcë ka zgjedhur kandidatin e PDSH-së për kryetar të Komunës së Tearcës, si dhe listën e kandidatëve për këshilltarë që do të garojnë në zgjedhjet lokale të vitit 2013.

Ruhan Iljazi, do të jetë pretendenti i PDSH-së për këtë komunë që ndodhet në rrethinën e Tetovës, ka vendosur Kuvendi Zgjedhor.

Në fjalimin e tij drejtuar të pranishmëve, Iljazi e ka cilësuar të rëndë gjendjen ku ndodhen shqiptarët në përgjithësi dhe ka akuzuar për paaftësi kryetarin e tanishëm të kësaj komune, në veçanti

“Kjo situatë detyrimisht kërkon një  angazhim maksimal të të gjithë neve, me qëllim që t'u gjendemi pranë  bashkëvendësve tanë të cilët ballafaqohen me probleme të shumta. Vizioni ynë si PDSH është që ta shohim Komunën e Tearcës një vend të zhvilluar, duke inkurajuar qytetarët për një zhvillim të përgjithshëm lokal. Për një udhëheqje të politikës së suksesshme ekonomike në nivel të komunës. Përkrahje për zhvillimin e ndërmarrjeve të vogla dhe të mesme. Do të jemi të koncentruar në zhvillimin infrastrukturor, e cila do të mundësoj një zhvillim më të lehtë ekonomik; zhvillim të arsimit dhe institucioneve arsimore si dhe zhvillimin shëndetësor. Fitorja e PDSH-së në këtë komunë dhe në komunat tjera është e pashmangshme”, ka deklaruar Iljazi.

Platforma e PDSH-së, ka vijuar më tej kandidati për Tearcën, është garanci për sukses dhe zhvillim të mirëfilltë ekonomik të shqiptarëve si dhe për sigurinë e tyre.