Armando Broja duket se do të qëndrojë në Premier League të paktën edhe për këtë sezon të ri futbollistik, ndonëse kërkesat për kartonin e tij këtë merkato vere ishin jo të pakta.
Gazetari italian Fabrizio Romano ka zbuluar se shtatlarti shqiptar ka pranuar të huazohet te skuadra e Ipswich Town, e ngjitur këtë vit në mesin e më të mirave të Anglisë, dhe që ka kryer një merkato cilësore.
Pasi Chelsea nuk pranoi ta shiste, palët kanë rënë dakord që ai të huazohet dhe duket se Ipswich është zgjedhja e duhur.
Gjithashtu, marrëveshja parashikon që “Traktorët” do ta transferojnë menjëherë Brojën verën e ardhshme për 30 milionë paund, nëse arrihet mbijetesa.
Çdo gjë pritet të konfirmohet shumë shpejt, me vizitat mjekësore që do të kryhen brenda këtyre 24 orëve.