Trajneri i Interit, Simone Inzaghi, është shfaqur si objektivi kryesor i Al-Hilal, të cilët po kërkojnë një zëvendësim për Jorge Jesus.
Sipas La Gazzetta dello Sport, Presidenti i klubit saudit, Fahad bin Saad bin Nafel beson se e ka bindur trajnerin italian të pranojë ofertën, pas një vizite personale në Milano në prill për negociata, të cilat i gjeti premtuese.
Thashethemet nga Arabia Saudite, të cituara nga gazetari Filippo Ricci, sugjerojnë se Inzaghi ka rënë dakord të udhëtojë për në Riad më 1 qershor – menjëherë pas finales së Ligës së Kampionëve kundër Paris Saint-Germain.
Ky udhëtim sipas Riccit vjen për të nënshkruar potencialisht një kontratë që ofron mbi 20 milionë euro në vit pas taksave.
Gjithashtu përflitet se familja e Inzaghit ose një përfaqësues i tij mund të vizitojë Riadin së shpejti për vëzhgime.
Kontrata aktuale e Inzaghit me Interin është e vlefshme deri në verën e vitit 2026, me raportet në fillim të majit që tregonin se ai ishte afër zgjatjes së saj deri në vitin 2027.