Sekretari amerikan i Shtetit, Antony Blinken, ka thënë të premten se për ShBA-në, status quo-ja nuk ishte një opsion për Afganistanin.
Ai ka thënë se Uashingtoni vazhdon me planet për tërheqjen e trupave nga Afganistani deri në shtator, pavarësisht rritjes së dhunës.
“Ne po shohim se në disa pjesë të caktuara të vendit, sulmet ndaj forcave afgane të sigurisë kanë shënuar rritje krahasuar me një vit më parë”, ka thënë Blinkeni gjatë udhëtimit të tij për në Paris të Francës.
Ai ka theksuar se ShBA-ja duhet të jetë më e ashpër në mbikëqyrjen zbatimit të procesit të paqes nga ana e talibanëve.
Dhuna është rritur ndjeshëm në të gjithë Afganistanin që kur Shtetet e Bashkuara në muajin prill njoftuan planet për të tërhequr të gjitha trupat e tyre deri më 11 shtator.