Arrihet dakordësia mes mazhorancës e opozitës për votën e diasporës, flet Bylykbashi

Grupi i dialogut për reformën zgjedhore mes mazhorancës dhe opozitës ka rënë parimisht dakord për votën e Diasporës.

Parimisht palët janë dakordësuar që të votojnë të gjithë qytetarët që jetojnë dhe punojnë jashtë vendit.

Nënkryetari i PD, Oerd Bylykbashi tha në një komunikim për mediat se drafti i paraqitur nga opozita është shumë i gjerë dhe nuk përfshin vetëm emigrantët.

“Në gjykimin tonë të gjithë shtetasit shqiptarë duhet të kenë të drejtë vote nëse ndodhen jashtë Shqipërisë për një arsye të rëndësishme për një kohë të caktuar. Të gjithë që janë emigrantë të ligjshëm apo jo por që kanë një adresë komunikimi; studentët, ushtarakët, të kenë mundësi të regjistrohen në KQZ me dokumentacionin që vlen për ato zgjedhje”, tha ai.