Begaj: Banorët e zonave të përmbytura të ndjekin udhëzimet e strukturave për evakuimin

Presidenti i Republikës, Bajram Begaj, njoftoi se po ndjek me shqetësim situatën e krijuar nga reshjet intensive në vend.

Begaj theksoi se është në komunikim të vazhdueshëm me drejtuesit e institucioneve qendrore dhe vendore, me Strukturat e Emergjencave Civile si dhe me Forcat e Armatosura, për përballimin e situatës së përmbytjeve.

Begaj fton qytetarët të mirëkuptojnë dhe bashkëpunojnë me institucionet, me qëllim që kjo situatë të kalojë me sa më pak pasoja.

Kreu i Shtetit fton në mënyrë të veçantë banorët në zonat e përmbytura të ndjekin udhëzimet e strukturave përgjegjëse për evakuim të shpejtë dhe të sigurt.

“Në këto momente të vështira jeta e çdo qytetari është mbi gjithçka”, theksoi Begaj.