Shkup, 10 nëntor – Vendimi për të ndaluar fondet nga Programi IPARD 3, për shkak të skandalit të fundit korruptiv në Agjencinë për Mbështetje Financiare të Bujqësisë dhe Zhvillimit Rural, ka ndezur alarmin në opinion publik dhe ka sjellë pasiguri në sektorin e bujqësisë — një nga degët më të rëndësishme ekonomike të vendit. Ekonomistët që u kontaktuan nga 24info.mk theksojnë se ky është një goditje si për bujqësinë, ashtu edhe për reputacionin e Maqedonisë në Bruksel.
“IPARD 3 është një program për periudhën 2021–2027, që synon modernizimin e bujqësisë, zhvillimin e zonave rurale dhe mbështetjen e agrobizneseve. Brenda programit të mëparshëm, IPARD 2, u realizuan mbi 2.300 projekte, gjë që e pozicionoi Maqedoninë si lidere rajonale në shfrytëzimin e fondeve evropiane. Bllokimi tani vë në pikëpyetje vazhdimësinë e këtij progresi. Edhe pse në nivel makroekonomik bllokimi përbën më pak se 1% të BPV-së, për bujqësinë efekti është i konsiderueshëm — mbi 11% e investimeve të planifikuara janë të rrezikuara. Kjo do të shkaktojë rreziqe reale për ngadalësimin e modernizimit të bujqësisë, uljen e konkurrueshmërisë së prodhimit vendas, rënien e punësimit në zonat rurale dhe do të minojë seriozisht procesin e përafrimit me standardet evropiane në bujqësi”, deklaroi deputeti Fatmir Bytyqi, i cili njëkohësisht ka qenë edhe zëvendëskryeministër për çështje ekonomike.
Ish-ministri i Financave, Kiril Minoski, nga ana e tij, vlerëson se ky vendim mund të ngadalësojë ndjeshëm zhvillimin e sektorit bujqësor dhe të zonave rurale.
“Bllokimi i fondeve nga IPARD 3, në vlerë prej 128 milionë eurosh, mund të ngadalësojë ndjeshëm zhvillimin e bujqësisë dhe të zonave rurale. Këto mjete janë thelbësore për modernizimin, investimet e reja dhe rritjen e konkurrueshmërisë së prodhuesve maqedonas. Një vonesë e tillë dërgon edhe një sinjal negativ ndaj Bashkimit Evropian lidhur me menaxhimin e fondeve. Shpresoj që situata të sqarohet shpejt dhe bllokimi të mos hyjë në fuqi”, tha Minoski.
Edhe Bytyqi shpreson në një zgjidhje të shpejtë të skandalit korruptiv, në mënyrë që programi të vazhdojë me zbatimin e tij.
“Zgjidhja e shpejtë e rastit dhe forcimi i kontrolleve janë thelbësore për të shmangur humbjen e plotë të fondeve dhe për të ruajtur besimin e institucioneve evropiane. Përndryshe, bllokimi mund të lërë pasoja të thella mbi bujqësinë, zhvillimin rural dhe ekonominë në tërësi,” përfundoi Bytyqi.