Britania dhe aleatë të tjerë do të sanksionojnë dy ministra izraelitë të ekstremit të djathtë

Britania dhe aleatë të tjerë ndërkombëtarë do të sanksionojnë zyrtarisht dy ministra izraelitë të ekstremit të djathtë.

Siç raportojnë mediat britanike, përcjell Telegrafi, bëhet fjalë për Itamar Ben-Gvir dhe Bezalel Smotrich – pas sjelljes së tyre gjatë luftës në Gaza.

Londra do t’i bashkohet Kanadasë, Australisë, Zelandës së Re dhe vendeve të tjera në ngrirjen e aseteve dhe vendosjen e ndalimeve të udhëtimit për ministrin e sigurisë kombëtare të Izraelit, Ben-Gvir dhe ministrin e financave, Smotrich.

Britania, ashtu si vendet e tjera evropiane, ka rritur presionin mbi qeverinë e kryeministrit izraelit, Benjamin Netanyahu, për t’i dhënë fund bllokadës së ndihmës në Gaza, ku ekspertët ndërkombëtarë kanë paralajmëruar se uria është e afërt.

Londra muajin e kaluar pezulloi bisedimet e tregtisë së lirë me Izraelin për ndjekjen e “politikave të ashpra” në Bregun Perëndimor dhe Gazën e pushtuar.

Ajo gjithashtu “ftoi” ambasadorin e saj dhe njoftoi sanksione të mëtejshme kundër kolonëve të Bregut Perëndimor.

Ministri i Jashtëm britanik, David Lammy, i cili e quajti ofensivën e fundit të Izraelit “një fazë të re të errët në këtë konflikt”, më parë i ka dënuar komentet e Smotrich mbi “pastrimin dhe shkatërrimin e mundshëm të Gazës dhe zhvendosjen e banorëve të saj në vende të treta”.