Manchester City nuk ka arritur të marrë më shumë se një pikë në një përballje dramatike kundër Crystal Palace, që ka përfunduar 2-2 në stadiumin “Selhurst Park” të shtunën në kuadër të Javës së pesëmbëdhjetë në Premier League.
Pas fitores 3-0 ndaj Nottingham Forest në mesjavë, e cila i dha fund një serie prej shtatë ndeshjesh pa fitore, City ka hyrë në fushë me moral të lartë, por entuziazmi i “Qytetarëve” është zbehur shpejt nga një gol i shpejtë i Munoz në minutën e katërt, pas një pasimi të saktë nga Hughes.
City nuk është dorëzuar dhe, në minutën e tridhjetë, Haaland ka barazuar shifrat me një goditje precize me kokë pas një asistimi nga Nunes.
Pjesa e parë është mbyllur me rezultatin 1-1, duke lënë gjithçka të hapur për pjesën e dytë.
Fillimi i pjesës së dytë ka sjellë një tjetër tronditje për ekipin e Pep Guardiolës. Lacroix ka shënuar me kokë pas një goditje këndi të Hughes, duke u dhënë sërish avantazhin vendasve. Megjithatë, City ka reaguar sërish me Rico Lewis, i cili ka realizuar nga distanca pas asistimit të Silva.
Në minutën e tetëdhjetë e katërt, City ka mbetur me një lojtar më pak, pasi Lewis ka marrë kartonin e dytë të verdhë dhe është përjashtuar nga loja. Edhe pse të reduktuar në numër, “Qytetarët” e kanë mbrojtur barazimin deri në fund.
Pas kësaj ndeshje, Manchester City gjendet në vendin e katërt në renditje, ndërsa Liverpool vazhdon të kryesojë tabelën e Premier League.