Shkup, 9 shtator – Drejtoresha e Agjencisë Telegrafike Shqiptare (ATSH), Valbona Zhupa në letër dërguar drejtorit të MIA-s, Dragan Antonovski shpreh ngushëllime për familjet e viktimave në zjarrin e mbrëmshëm në Tetovë.
“Me pikëllim të madh dëgjova për zjarrin në spitalin për Kovid në Tetovë që rezultoi me jetë të humbura dhe të lënduar. Unë dua t’ju siguroj se ATSH-ja qëndron pranë popullit të Republikës së Maqedonisë së Veriut në këtë kohë të rëndë dhe shpreh ngushëllime të thella për familjet e viktimave dhe sinqerisht shpreson për shërim të shpejtë të të lënduarve”, thotë Zhupa në letër.
Ajo njëherit thekson se ATSH për të gjithë ngjarjen merr informacione nga MIA dhe në të njëjtën kohë i transmeton lajmet e fundit nga vendi tek qytetarët në Shqipëri.
