Agjencia Zhurnal.mk
Kulturë

Egjiptologët zbulojnë varre të rralla para faraonëve

(Reuters) – Arkeologët egjiptianë që punojnë në deltën e Nilit kanë zbuluar dhjetëra varre të rralla paradinastike, që datojnë nga periudha para mbretërive faraonike të Egjiptit, të cilat lindën para më shumë se 5 mijë vjetësh.

Përveç kësaj, ata kanë gjetur edhe varreza nga periudha e vonë e hyksosëve (1650 deri 1500 para erës sonë), kur ardhësit nga Azia Perëndimore zaptuan vendin, duke i dhënë fund Mbretërisë së mesme në Egjipt.

Gjetjet nga provinca Dakahlia, në veri të Kajros, mund të hedhin dritë mbi dy periudha të rëndësishme kalimtare në Egjiptin e lashtë, kanë thënë egjiptologët.

Varret përfshijnë 68 sosh, prej periudhës Buto që filloi rreth viteve 3300 para erës sonë dhe pesë të tjera nga periudha e Nakadas III, e cila ishte veçse pak para shfaqjes së dinastisë së parë në Egjipt, rreth viteve 3100 para erës sonë, thuhet në një deklaratë të Ministrisë së Turizmit dhe Antikiteteve.

Image

Ato përfshijnë edhe 37 varre nga koha e hyksosëve, që fillimisht nisën të migrojnë përmes Sinait në Egjipt rreth viteve 1800 para erës sonë.

“Kjo është një varrezë tejet interesante, për shkak se gërsheton disa prej periudhave të hershme të historisë egjiptiane me një periudhë tjetër të rëndësishme – koha e hyksosëve”, ka thënë Salima Ikram, egjiptologe në Universitetin amerikan të Kajros. “Egjiptologët po punojnë që ta kuptojnë se si egjiptianët dhe hyksosët jetuan bashkërisht dhe në ç’shkallë u mbështetën në traditat egjiptiane”.

Varret e Butos ishin me gropa në formë vezake, me trupa të vendosur brenda në pozitën galiç, kryesisht në anën e tyre të majtë, me kokën e drejtuar në perëndim, thuhet në kumtesën e Ministrisë.

Disa prej varreve nga periudha e Nakadas përmbanin edhe enë cilindrike në formë dardhe.

Varret hyksose ishin kryesisht gjysmë-drejtkëndore, me trupa të vendosur në pozicion të shtrirë e me kokën e kthyer nga perëndimi.

“Misioni ka gjetur edhe një grup furrash, sobash, mbetje themelesh me tulla prej balte, vazo qeramike dhe hajmali, disa prej të cilave ishin të bëra me gurë gjysmë të çmuar dhe stoli të tilla si vathë”, thuhet në kumtesë.

Përktheu: Salih Mehmeti

Postime të ngjashme

Koncerti “Serenata 21” i rikthen Korçës gjallërinë, emocione te qytetarët dhe turistët

S.B.

Për partiturën e baletit të parë shqiptar, “Halili dhe Hajria”

S.B.

Shitet në ankand për 103.4 milionë dollarë piktura e Pikasos

S.B.

Smithsonian rihap tetë nga muzetë e famshëm

S.B.

Monumenti i rëndësishëm i kulturës sonë kombëtare

S.B.

Jean-Michel Basquiat artisti i parë me dy vepra në ankand

S.B.

This website uses cookies to improve your experience. We'll assume you're ok with this, but you can opt-out if you wish. Akcepto Më tepër...