Fauci: SHBA-ja mund ta vë nën kontroll pandeminë më 2022

Eksperti kryesor i sëmundjeve infektive në SHBA, Anthony Fauci, tha se Shtetet e Bashkuara mund ta vendosin nën kontroll pandeminë e COVID-19 në fillim të vitit të ardhshëm nëse do të ketë më shumë të vaksinuar.

 

Deklarata e tij u bë më 24 gusht, një ditë pasi qeveria federale dha miratimin e plotë për vaksinën Pfizer/BioNtech.

Dr. Anthony Fauci, këshilltar për shëndetësi i presidentit amerikan, Joe Biden, tha se miratimi i plotë për vaksinën Pfizer/BioNtech nga Administrata e Ushqimit dhe Barnave (FDA) hap rrugën që më shumë njerëz të vaksinohen.

“Unë do të doja t’u bëja thirrje njerëzve që nuk janë të vaksinuar të kuptojnë se ne kemi aftësinë të shkurtojmë afatin kohor për të arritur në fund të kësaj pandemie”, tha Fauci gjatë një konference për media.

Miratimi i plotë për vaksinën e Modernës mund të bëhet brenda kësaj jave, shtoi ai.

Zyrtarët amerikanë gjithashtu u bënë thirrje punëdhënësve privatë dhe qeverive shtetërore dhe lokale të kërkojnë nga punonjësit e tyre që të vaksinohen.

Ushtria amerikane, disa biznese, universitete dhe organizata tjera kanë filluar ta bëjnë obligative vaksinimin.

Më 24 gusht më shumë punëdhënës të mëdhenj amerikanë njoftuan se do të kërkojnë vaksinimin e punëtorëve.

Ndërsa presidenti Biden, më 24 gusht, kërkoi nga sektori privat dhe qeveritë lokale që t’i urdhërojnë punonjësit e tyre që të vaksinohen kundër koronavirusit.

“Nëse jeni udhëheqës biznesi, udhëheqës jofitimprurës, udhëheqës shtetëror ose lokal, që keni pritur miratimin e plotë të FDA-së për të kërkuar vaksinimin, unë ju bëj thirrje që ta bëni këtë tani”, tha Biden.

Pfizer/BioNTech është miratuar për përdorim emergjent qysh në dhjetor.

Që atëherë, mbi 204 milionë njerëz vetëm në SHBA e kanë marrë këtë vaksinë.

Pak mbi gjysma e popullsisë në SHBA është e vaksinuar plotësisht kundër koronavirusit.

Dy vaksinat tjera që jepen atje, janë: Moderna dhe Johnson&Johnson.

Related posts

CIA heton Sindromën e Havanës

D V

Vaksinat zvogëlojnë rrezikun nga “koronavirusi i gjatë”

D V

Të paktën 42 njerëz kanë humbur jetën në Gjermani si pasojë e përmbyjeve

N E

This website uses cookies to improve your experience. We'll assume you're ok with this, but you can opt-out if you wish. Accept Read More

WP2Social Auto Publish Powered By : XYZScripts.com