Shkup, 18 korrik – Italia mbetet partneri ynë dhe mbështetës i fuqishëm në procesin e integrimeve evropiane, kanë konstatuar në takimin e punës ministri i Drejtësisë Igor Filkov dhe ambasadori i Italisë në vend Andrea Silvestri, bëri të ditur Ministria e Drejtësisë.
Në takim ambasadori Silvestri i uroi ministrit të Drejtësisë Filkov punë të suksesshme në kryerjen e funksionit, me ç’rast është biseduar për avancimin e bashkëpunimit të suksesshëm ndërmjet dy vendeve, si dhe për mundësitë e shkëmbimit të përvojave.
“Veçanërisht i rëndësishëm është bashkëpunimi dypalësh ndërmjet Agjencisë Italiane Kundër Korrupsionit dhe KSHPK-së, si dhe mbështetja në fushën e së drejtës”, thuhet në njoftim.
Ministri Filkov, siç theksojnë nga Ministria e Drejtësisë, i rikonfirmoi përfitimet e marrëdhënieve të shkëlqyera dhe miqësore mes dy vendeve, të cilat do të intensifikohen në periudhën e ardhshme.