Himarjotët me 4 gusht do t’i drejtohen sërish kutive të votimet për të zgjedhur drejtuesin e bashkisë së tyre.
Vangjel Tavo, kandidati i PS, tregoi përse mendon se Edi Rama zgjodhi dikë nga Gjirokastra, si ai vetë, për të rimarrë Himarën.
“Jam propozuar nga kryeministri Rama për të qenë kandidat i PS-së për të qenë kandidat për të përfaqësuar forcën politike në zgjedhjet e Bashkisë së Himarës. Unë shquhem si njeri që i zgjidh problemet dhe nuk krijoj kurrë probleme”, u shpreh Tavo në A2 CNN.
Opozita shkoi edhe më larg, deri në SHBA, për të gjetur kandidatin e saj, por për zgjedhësi, si njeriu i ngarkuar për të bërë zgjedhjen e duhur, kreu i PBDNJ-së, Vangjel Dule, preferon më shumë të komentojë zgjedhjen e rivalit.
“Zoti Tavo tha se, mua më caktoi kryeministri. Pra, ai është alterego e kryeministrit në Himarë. Zoti Gjikuria, në radhë të parë, është një nga familjet e shquara të trevës së Himarës. Ai ka qenë gjithmonë i aktivizuar. Çdo vit, në verë ai është në Himarë”, tha Dule në A2 CNN.
Zgjidhja e problemeve me pronat në Himarë janë kthyer prej vitesh në platformë politike nga të dy krahët e politikës.
“Nuk ka për t’u toleruar asnjë person që hiqet si investitor dhe vjen atje për të grabitur tokat e himarjotëve”, thotë Tavo.
“Zoti Gjikuria vjen me një sensibilitet për mbrojtjen e pronës si ajo e sanksionuar në Kushtetutën e Shteteve të Bashkuara të Amerikës që është e shenjtë”, thotë Dule.
Edhe pse fushata nuk është hapur ende zyrtarisht, palët kanë nisur punën në terren. Madje, Dule hedh dyshime për manipulim të listës së zgjedhësve.
“Skandali më i madh ka ndodhur me listat e zgjedhësve, me shtesat që janë bërë në listat zgjedhore brenda muajve të fundit”, thotë Dule.
Tavo nuk ka asnjë kritikë për kundërshtarin e tij në garë, por nuk harron të ironizojë kreun e PBDNJ. “Herën tjetër do t’i kërkojë Ramës vizë!”