Hasani: Janë stabilizuar numrat, por jo gjendja me Covid-19 (Video)

Shkup, 5 shtator – Agresiviteti i përhapjes së virusit korona në këtë valë të katërt nuk është aq i lartë sa para 2 javësh! Ka trend të stabilizimit të numrave, por ende jemi larg nga stabilizimi i gjendjes në përgjithësi thotë për TV21 zëvendësministri i Shëndetësisë Ilir Hasani, duke shtuar se ende nuk dihet se çfarë trendi do të marrë vala e katërt.

 

“Kemi filluar tani edhe me shkollat, nuk jemi të sigurt 100% se shkollat nuk do të ndikojnë në rritjen e numrit të të infektuarve. Ne saktë e dimë se është përqindje shumë e vogël e pacientëve të cilët janë të moshës nën 18-vjeçare, diku rreth 3%, por ne nuk e dimë se sa ata do të infektojnë më të rriturit. Në bazë të informacioneve primare që kemi nuk ka ndonjë problem të madh edhe pse kanë filluar shkollat me prezencë fizike”, tha për TV21, zëvendësministri i Shëndetësisë Ilir Hasani.

Hasani shton se presioni në spitale mbetet serioz, ndonëse nuk është si ai që ishte para 2 javësh! Këtë zbutje të presionit e konfirmon edhe mjekja Miranda Pajaziti nga qendra Kovid në Tetovë.

“Kemi rënie të të hospitalizuarve, ja sot kemi numër dyshifror të të hospitalizuarve, fatmirësisht nga ditët e tjera, sot janë 98 të hospitalizuar. Të gjithë janë në oksigjen, të gjithë ende janë rëndë, mirëpo kemi edhe rënie të numrit të kontrolleve në ambulanca. Mbrëmë kemi pasur 93 kontrolle dhe 9 fletë-lëshime dhe ky është një lajm i mirë se kemi pasur fletë-lëshime, po fletkeqësisht kemi një viktimë”, potencoi Miranda Pajaziti nga Covid-Qendra në Tetovë.

Asnjë prej 98 të hospitalituarve në Tetovë nuk është i vaksinuar, tregon doktoresha Pajaziti, duke shtuar se përqindja e vaksinimit në Tetovë është rritur në mbi 38%. E zëvendësministri Hasani pohon se pikërisht vaksinimi si dhe shtrëngimi i masave mbrojtëse janë arsyeja që vala e katërt e pandemisë është më e butë.

“Ky vaksinim është përgjegjës për këtë valë që duket se është më e dobët se vala e mëparshme që e patëm. Ka shumë faktorë që kanë ndikuar në stabilizimin e gjendjes, uljen e valës së katërt, respektivisht vala e katërt është pak më e butë se e mëparshmja, të paktën ashtu kemi parandjenjën, të gjitha parametrave që i analizojmë na drejtojnë se vala e katërt është më e butë”, deklaroi për TV21, Ilir Hasani – zëvendësministër i Shëndetësisë.

Në Maqedoninë e Veriut janë mbi 15 mijë raste aktive me COVID-19. Në krye të listës vazhdon të jetë Shkupi me mbi 6 mijë raste aktive, i ndjekur nga Tetova me mbi 1800, Gostivari mbi 1000 dhe Kumanova mbi 900 raste aktive. Që nga fillimi i pandemisë virusi korona u ka marrë jetën mbi 6 mijë qytetarëve.

Related posts

Mickoski: Nuk ka alternativë për anëtarësimin në BE

Z H

Raporti i 24 orëve të fundit në Maqedoni: 29 viktima, 561 të infektuar

Redaksia

Forum rajonal: Gjyqësia e pavarur dhe e paanshme është themel i qeverisjes demokratike

Z H

This website uses cookies to improve your experience. We'll assume you're ok with this, but you can opt-out if you wish. Accept Read More

WP2Social Auto Publish Powered By : XYZScripts.com