Shkup, 12 dhjetor – Kryetari i Komunës së Çairit, Izet Mexhiti, ka zhvilluar sot një takim emocionues me babain e dëshmorit të Kosovës, Mujdin Aliu – babë Qerimin. Mexhiti tha se ky takim ishte nga ato momente që të prekin thellë dhe të rikujtojnë peshën e amanetit të heronjve kombëtarë.
“Qetësia e tij, mënyra si flet për të birin dhe sakrificën e familjes së tij, të japin forcë për më shumë punë, përkushtim dhe përgjegjësi ndaj detyrës,” u shpreh Mexhiti.
Ai theksoi se babai i Mujdinit ruan me dinjitet kujtimin e djalit, i cili u rreshtua në radhët e Ushtrisë Çlirimtare të Kosovës dhe u bë pjesë e pavdekësisë së Koshares. “Në fytyrën dhe fjalët e tij sheh krenarinë, dhimbjen dhe qëndrueshmërinë që e kanë mbajtur gjallë frymën e lirisë në këtë vend,” shtoi Mexhiti.
Kreu i Çairit falënderoi babë Qerimin për vizitën, urimet dhe mbi të gjitha për sakrificën që familja Aliu i ka dhënë kombit. “Vepra e Mujdin Aliut do të mbetet gjithmonë një dritë që na udhëheq dhe një kujtesë e fortë për rrugën që kemi përpara,” përfundoi Mexhiti.
https://www.facebook.com/share/p/1G4aanM3JF/
