Maqedoni

Javën tjetër bisedimet për ndarjen e posteve

Zhurnal Ads

Shkup, 5 shtator – Pasi u emëruan ministrat e Qeverisë së re, javën që vjen pritet të nisin bisedimet mes partnerëve të koalicionit për të ndarë përgjegjësitë edhe në nivele të tjera, siç janë postet zëvendës-ministrore, sekretariatet, drejtoritë dhe agjencitë.

Pritet që të ketë rotacion të këtyre posteve mes partnerëve të koalicionit, LSDM e BDI, ndërsa kreu socialdemokrat Zoran Zaev thotë se ende nuk ka menduar për postet në eshalonin e dytë dhe të tretë.

“Ende nuk kam vendosur sepse java e parë është kohë kur duhet të bëhet pranim-dorëzim dhe për të hyrë në punën e qeverisë, për punët e rëndësishme dhe të sillen vendimet urgjente për qytetarët. Javën tjetër për herë të parë do të mendohem për atë” tha për TV21 kreu i LSDM-së Zoran Zaev.

Jozyrtarisht pritet që BDI të ketë zëvendësministra në Ministrinë e Brendshme, atë të Transportit dhe Lidhjeve, Drejtësisë, Shëndetësisë dhe Mbrojtjes. Drejtoritë e reja që mund t’u takojnë integristëve  jozyrtarisht përflitet se janë MEPSO, Ndërmarrja “Rrugët Shtetërore”, Agjencia për Komunikime elektronike, Navigacionin Ajror “M-NAV” dhe Agjencinë e ilaçeve “Malmed”.

E krahas dy partnerëve më të mëdhenj të koalicionit LSDM-BDI, kulaçi ekzekutiv kësaj radhe ndahet edhe me Lëvizjen “Besa”, e cila nga postet ministrore ka marrë vetëm një, atë të Bujqësisë. Kreu Bilall Kasami thotë se bisedimet me partnerin Zaev po vazhdojnë.

“Si Lëvizje Besa vazhdojmë të bisedojmë me partnerët e tjerë të koalicionit për ndarje të përgjegjësive edhe në eshalonet e tjera dhe në javët në vijim do të kemi përgjigje konkret”, u shpreh kreu i Lëvizjes Besa, Bilall Kasami.

Dy postet zëvendës-ministrore për të cilat tashmë dihet se do t’i takojnë “Besës”, është Ministria e Arsimit ku zëvendësministër pritet të jetë Arafat Shabani, ndërsa për zëvendësministër të Kulturës kandidat është Sedat Sulejmani.

Burime nga “Besa” thonë se nënkryetari i partisë Abdush Demiri pritet të drejtojë me një nga ato që konsiderohen si drejtoritë më të rëndësishme, siç është Fondi Pensional, Postat e Maqedonisë ose Agjencia për Veterinari dhe Ushqim. “Besa” në bisedime është edhe për Agjencinë për Rini dhe Sport, por ky dikaster ende mbetet pikëpyetje se kush do ta marrë. Të njëjtat burime tregojnë se Besës pritet t’i takojë edhe posti i drejtorit të Inspektoratit i Tregut, Inspektoratit Teknik ose Entit Hidrometeorologjik. Po ashtu pritet që “Besës” t’i takojë një post drejtori në teatër, ose të Teatrit të Shkupit, ose atë të Tetovës.

Postime të ngjashme

Protesta të VMRO-DPMNE-së në shtatë qytete

admin

VMRO-DPMNE: Filipçe dhe Zaev janë drejtpërdrejt përgjegjës për vdekjen e mbi 1.500 njerëzve

XH,I

“Centre for Common Ground” dhuron pajisje sportive për shkollat fillore në Çair

Z H
duke ngarkuar....

This website uses cookies to improve your experience. We'll assume you're ok with this, but you can opt-out if you wish. Accept Read more...