Prokuroria Themelore në Prizren ka kërkuar nga Gjykata Themelore caktimin e masës së paraburgimit për një muaj ndaj 10 personave të dyshuar për bixhoz.
Masa e paraburgimit për 30 ditë është kërkuar ndaj të dyshuarve L.R, P.B., B.Q., F.C., B.K., P.Sh., N.R., S.B., R.A., dhe M.Sh.
Në njoftimin e Prokurorisë thuhet se kërkesa lidhet me rastin e 28 shkurtit, kur rreth orës 23:00 në një kafiteri në Suharekë, pronari i lokalit me qëllim të përfitimit të kundërligjshëm të dobisë pasurore për vete, organizon dhe merr pjesë në organizimin e lojërave të fatit, të cilat janë të ndaluara me Ligjin Nr.06/L-155 për ndalimin e lojërave të fatit, ashtu që në mënyrë të kundërligjshme dhe të fshehtë, lokalin e përdorë për lojëra të fatit.
“Me rastin e lokalizimit të vendit nga zyrtarët policorë kur të njëjtit tentojnë të hyjnë në lokal, dera e lokalit ishte e mbyllur me çelës nga brenda, dhe ishte me pak ndriçim, e pas tentimit të zyrtarëve për ta hapur derën, aty i pandehuri L.R., e hap derën, ku gjatë kontrollit nga zyrtarët policorë brenda në lokal në tavolinat ku kanë qenë ulur të pandehurit e lartëcekur janë hasur në total dyqind e tetë (208) letra, nëntëdhjetë e gjashtë (96) kartela me mbishkrimin AliExpress me barcode, të cilat dyshohet se janë kartela për lojërat e fatit online”, thuhet tutje në njoftim.
Më tej bëhet e ditur se nga të pandehurit janë sekuestruar 15,260 euro dhe 1,200 franga zvicerane.
Të pandehurit L.R.,P.B., B.Q., F.C., B.K., P.Sh., N.R., S.B., R.A., dhe M.Sh., gjenden në ndalim 48-orësh.