Kina do të përsëritë 77 masa pilot nga Zona e Tregtisë së Lirë (ZTL) Pilot e Kinës (Shangai) në ZTL-të e tjera dhe në mbarë vendin, në përpjekje për t’u përafruar me rregullat ekonomike e tregtare ndërkombëtare të standardeve të larta dhe për të nxitur hapjen institucionale me nivel të lartë, sipas një qarkoreje të publikuar të enjten nga Këshilli i Shtetit i Kinës.
Masat përfshijnë shtatë fusha kryesore: tregtia në shërbime, tregtia e mallrave, tregtia digjitale, mbrojtja e pronësisë intelektuale, reforma e prokurimeve qeveritare, reforma institucionale e menaxhimit ndërkufitar dhe parandalimi e kontrolli i rrezikut.
foto nga VCG
Nga paketa e përgjithshme, 34 masa do të shtrihen në ZTL-të e tjera në mbarë vendin, duke përfshirë ato që lidhen me novacionin në skenarët e përdorimit të monedhës kineze digjitale, përmirësimin e menaxhimit të fondeve ndërkufitare për kompanitë shumëkombëshe dhe mekanizmin e listës negative të eksportit të të dhënave.
43 masat e tjera do të zbatohen në mbarë vendin, duke mbuluar aplikacionet e pagesave elektronike ndërkufitare, njohjen e certifikimit të kodimit komercial, certifikimin e menaxhimit të sigurisë së të dhënave, transparencën e të dhënave qeveritare dhe platformat digjitale të prokurimeve qeveritare.
foto nga VCG
Nisma bazohet në një plan të nëntorit 2023, që e pozicionoi ZTL-në pilot të Shangait si një pioniere në përputhjen me rregullat ekonomike e tregtare ndërkombëtare të standardeve të larta, duke e përcaktuar atë si një zonë demonstruese kombëtare për hapjen institucionale.
Qarkorja thekson që këto përpjekje mbështesin strategjinë e Kinës për të shfrytëzuar hapjen institucionale të nivelit të lartë për të nxitur reforma më të thella dhe zhvillimin me cilësi të lartë.