Opinion

Kokëfortësia vrastare në kohë pandemie

Autor: Xhelal Neziri

Një 16 vjeçar nga Shkupi as që kishte besuar se virusi ekziston. E kishte jetuar jetën normalisht, si të mos kishte një pandemi e cila ka futur në ankth tërë botën. Nuk kishte besuar mediat profesionale, por ishte zbavitur me portalet që mendojnë vetëm për fitimin nga klikimet. Madje shpesh me kokëfortësi i kishte bindur edhe moshatarët e tij se ky është një grip i thjeshtë që kalon me dy paracetamola.

E gjithë përalla e tij zgjati derisa nuk e solli virusin në shtëpi, ku jetonte me nënën, babain, gjyshen dhe gjyshin. Virusi së pari i mori jetën gjyshit, pastaj gjyshes, më vonë babait e në fund edhe nënës së tij.

Kjo është një ndodhi e frikshme, tragjike dhe dhimbshme. Një familje e tërë u fshi nga papërgjegjshmëria e një të riu. Këtë ngjarje të vërtetë për herë të parë në publik e tregoi në një intervistë për portalin MKD akademiku maqedonas Prof.Dr.Metodi Çepreganov.

“Unë nuk dua të tremb ose traumatizoj tjerët. Por është një gjendje e rrezikshme për jetën. Jo sepse unë mendoj kështu, apo dikush tjetër, por bota u gjend në një luftë biologjike dhe një pjesë e madhe e popullit maqedonas e kuptoi atë. Ata mbajnë maska, janë të kujdesshëm, sepse kjo është mënyra e vetme. Por ka 30 për qind e më shumë, veçanërisht të rinjtë, që me kotësi dhe kokëfortësi, me ego të hipertrofizuar nuk respektojnë masat dhe të gjithë vuajnë. Unë kam një shembull të një familjeje, një fëmijë 16-vjeçar solli infeksionin në shtëpi, e brenda një periudhe të shkurtër i vdiqën babai, nëna dhe gjyshërit. Ai i “pastroi” të gjithë për shkak të mosbindjes, pakontrollueshmërisë së tij. Ai nuk mund ta kuptonte se është përcjellës i virusit”, ka thënë Çepreganov.

Vala e dytë e pandemisë me COVID-19 po merr hov. Numri i rasteve të reja dje arriti numrin rekord prej 445 të prekur. Shtretërit në spitale gjithnjë e më shumë mungojnë. Ky numër mund të arrijë edhe në 1500 në ditë nëse vazhdon mospërfillja e masave. Kjo do të paralizonte sistemin e brishtë shëndetësor i cili nuk do të mund t’i përgjigjet situatës së krijuar.

Në bazë të të dhënave zyrtare, mbi 82 përqind e të vdekurve nga COVID-19 në Maqedoninë e Veriut kanë kërkuar ndihmë mjekësore afërsisht 10 ditë pas paraqitjes së simptomave të para, si mungesa e shijes apo nuhatjes. Pra, kur sëmundja ka përparuar aq shumë saqë mjekët e kanë të pamundur të bëjnë më shumë. Kjo kërkon një syçelësi apo vëmendje të madhe që ndihma mjekësore të kërkohet që në ditët e para të hetimit të simptomave.

Pandemitë dhe epidemitë nuk janë sëmundje individuale. Ato bëjnë pjesë në sferën e shëndetit publik, që implikon një përgjigje kolektive ndaj kësaj flame. Nëse vetëm 1% e popullsisë nuk i respekton masat, ai i bën favor virusit duke e përcjellë në më shumë njerëz. Andaj përgjigjja duhet të jetë si familje, shkollë, restorant, si fshat, si mëhallë, si qytet, si rajon dhe si shtet.

Postime të ngjashme

Morali i shqiptarëve, në mes të këmbëve të gruas

admin

“Zeitenwende”: një paralajmërim

admin

Ballkani si ombrellë civilizuese

admin

This website uses cookies to improve your experience. We'll assume you're ok with this, but you can opt-out if you wish. Accept Read more...