Kryetari i Komunës së Pejës, z. Gazmend Muhaxheri, dhe Kryetari i Lidhjes së Bizneseve të Kosovës, z. Besart Dreshaj, kanë nënshkruar një Memorandum Mirëkuptimi për të forcuar bashkëpunimin dhe zhvillimin ekonomik në Komunën e Pejës.
Ky memorandum synon të rregullojë marrëdhëniet ndërmjet palëve për të arritur qëllime të përbashkëta në fusha të ndryshme, duke përfshirë promovimin e prodhimeve vendore në kuadër të nismës “Java e Biznesit Kosovar”, zhvillimin e projekteve ekonomike lokale, dhe nxitjen e investimeve të huaja.
Komuna e Pejës, përmes një njoftimi në faqen e saj zyrtare në Facebook, ka bërë të ditur nënshkrimin e Memorandumit të Mirëkuptimit dhe Bashkëpunimit me Lidhjen e Bizneseve të Kosovës.
“Ky memorandum do të krijojë mundësi të reja për bizneset dhe komunitetin tonë, duke mbështetur prodhimet vendore dhe duke sjellë investime të reja në rajon”, shkruan Komuna e Pejës transmeton Telegrafi.
Ky partneritet pritet të sjellë përfitime të shumta për komunitetin, duke përmirësuar klimën e investimeve dhe duke promovuar një mjedis të favorshëm për rritjen dhe zhvillimin e qëndrueshëm ekonomik në Pejë.