Kryeministri i Kosovës, Albin Kurti, ka thënë se niveli i ri i pagës minimale do të jetë 2 euro për orë punë të rregullt apo 350 euro bruto në muaj me orar të plotë, pas miratimit të propozim-vendimit për caktimin e pagës minimale në Republikën e Kosovës, raporton Ekonomia Online.
Në mbledhjen e Qeverisë të mërkurën, Kurti ka thënë se paga minimale, me ligjin e ri, do të jetë e liruar nga tatimi, teksa e ka cilësuar këtë si rritjen e dytë të pagës minimale gjatë mandatit të tij.
“Me hyrjen ne fuqi të pagës minimale u hap rruga që të rritet paga minimale pas 13 vjetësh. Niveli i ri i pagës minimale do të jetë 2 euro për orë punë të rregullt apo 350 euro bruto në muaj me orar të plotë. Paga minimale do të jetë e liruar nga tatimi. Kjo është rritja e dytë e pagës minimale në këtë mandat qeverisës”, ka thënë ai.
Kurti ka thënë se me 17 gusht 2011 ishte hera e fundit kur është rritur paga minimale dhe se ne atë kohë diskriminoheshin të rinjtë.
“Sot pas 13 vitesh po e ndryshojmë këtë duke modifikuar pagën minimale për të gjitha moshat pa dallime. Niveli i ri do të jete 2 euro për orë punë të rregullt apo 350 euro bruto në muaj me orar të plotë. Kjo pagë minimale do t’i prek 150 mijë të punësuar”, ka thënë Kurti.
Ministri i Financave, Hekuran Murati, ka bërë të ditur se ky vendim hynë në fuqi me 1 tetor.
“Hiqet diskriminimi për grup moshat. Është përcaktimi edhe i pagës minimale me orë. Paga minimale e përcaktua sot do të hyjë në fuqi që nga data 1 tetor”, ka thënë ai.