Shkup, 17 korrik– Komuniteti Politik Evropian (EPC), i cili përfshin vende anëtare të BE-së dhe jashtë BE, do të mbajë samitin e tij të 4-të në Mbretërinë e Bashkuar të enjten për të diskutuar Ukrainën, energjinë, mbrojtjen e demokracisë dhe migrimin ilegal.
Në këtë samit, ku grumbullohen presidentët dhe kryeministrat e 45 vendeve, Maqedoninë e Veriut do e përfaqësojnë kryeministri Hristijan Mickoski dhe zv/kryeministri i parë, Izet Mexhiti.
Samiti do të ketë një sesion hapjeje, një seancë përmbyllëse dhe tre tryeza të rrumbullakëta.
“Njëra tryezë e rrumbullakët do jetë për nxitjen e lidhjes energjetike, tjetra për menaxhimin e migracionit dhe e treta për trajtimin e manipulimit të informacionit dhe ndërhyrjes së huaj”, thotë Mexhit për Zhurnal.
Ai shton se temë e rëndësishme veç energjetikës, do të jetë edhe rritja e mbështetjes ndërkombëtare për Ukrainën përpara sezonit të dimrit.
Udhëheqësit do të diskutojnë gjithashtu sfidat globale dhe rajonale, me fokus në bashkëpunimin për të luftuar migrimin e parregullt dhe për të forcuar sigurinë evropiane.
“Ky samit, ndryshe nga samiti i mëparshëm, do të përfshijë për herë të parë NATO-n, Organizatën për Siguri dhe Bashkëpunim në Evropë (OSBE) dhe Këshillin e Evropës”, thekson Mexhiti.
Komuniteti Politik Evropian është një forum ndërqeveritar për diskutime politike dhe strategjike për të ardhmen e Evropës, i themeluar në vitin 2022 pas agresionit rus në Ukrainë. Grupi u takua për herë të parë në tetor 2022 në Pragë, me pjesëmarrës nga 44 vende evropiane, si dhe Presidentët e Këshillit Evropian dhe Komisionit Evropian. Ai dallon si nga Bashkimi Evropian (i cili është pjesëmarrës) ashtu edhe nga Këshilli i Evropës.
Samiti mbahet në Pallatin Blenheim, vendlindja e ish-kryeministrit britanik Winston Churchill, që ndodhet afërsisht 100 kilometra (62 milje) nga Londra. /Zhurnal