Agjencia Zhurnal.mk
Bota

Migrantët zhvendosen nga kampi Lipa i Bosnjës

Njëmbëdhjetë autobusë kanë arritur të martën pranë kampit Lipa, afër Bihaqit, në veriperëndim të Bosnje e Hercegovinës, për transportimin e migrantëve në një vend të ri, konfirmoi për Shërbimin e Ballkanit të Radios Evropa e Lirë Ministria e Brendshme e Kantonit Una-Sana.

Ministri i Sigurisë i Bosnje dhe Herzegovinës, Sellmo Cikotiq, tha se migrantët që mbetën pa strehim pas zjarrit në kampin Lipa, do të vendosen përkohësisht në vendin e një ish-strukture ushtarake në Bradina.

Më 23 dhjetor, përfaqësues të Organizatës Ndërkombëtare për Migrim (IOM) janë tërhequr nga kampi i përkohshëm i migrantëve Lipa dhe kanë ndërprerë ndihmën në këtë kamp.

Në të njëjtën ditë, një nga çadrat është përfshirë nga zjarri dhe pjesa më e madhe e kampit është shkatërruar.

Pas tërheqjes së IOM-it, strehimi alternativ për migrantët nga kampi Lipa nuk është siguruar.

Kriza e migrantëve në kantonin Una-Sana është komplikuar, sepse qeveria kantonale ka hequr dorë nga marrëveshja për transferimin e migrantëve nga kampi Lipa në kampin Bira, ka thënë më herët Cikotiq.

Përveç rreth 800 migrantëve në vendin e ish-kampit Lipa, vlerësohet se në këtë zonë janë edhe rreth 2,000 njerëz në ndërtesa të braktisura dhe kampe të improvizuara.

Në një deklaratë të nënshkruar nga Këshilli Danez i Refugjatëve, IOM, Agjencia për Refugjatë e Kombeve të Bashkuara (UNHCR), si dhe organizatat Save the Children dhe Mjekët Pa Kufij, autoriteteve të Bosnjës u është bërë thirrje që të reagojnë me urgjencë, sepse, siç është thënë, ata që kanë mbetur në vendin e kampit, “janë në rrezik të menjëhershëm kur bëhet fjalë për sigurinë, shëndetin dhe mbrojtjen”.

Në Bosnje ndodhen mijëra migrantë, kryesisht të ikur nga luftërat në Lindjen e Mesme.

Migrantët që synojnë të arrijnë në Evropë, shpesh hyjnë në Bosnje përpara se të kalojnë në Kroaci – vend anëtar i Bashkimit Evropian – dhe të vazhdojnë më pas më në perëndim.

Postime të ngjashme

Kina: Pretendimet për gjenocid ndaj ujgurëve janë absurde

T E

Zyrtarët vizitojnë kufirin SHBA-Meksikë mes rritjes së fluksit të emigrantëve

T E

Humb jetën në një aksident ajror parlamentari francez Olivier Dassault

T E

Ligjvënësi gjerman jep dorëheqjen, përfitoi nga kontratat për maskat

T E

Asnjë i vdekur nga Covid-19 në 24 orët e fundit në Britani

T E

Austria pezullon vaksinat AstraZeneca, një grua humbi jetën, një tjetër është në gjendje të rëndë

T E

This website uses cookies to improve your experience. We'll assume you're ok with this, but you can opt-out if you wish. Akcepto Më tepër...