Shkup, 24 prill – Ministri i Punëve të Jashtme dhe Tregtisë së Jashtme, Timço Mucunski, sot ka pranuar kopjet e letrave kredenciale nga ambasadori i sapoemëruar i jashtëzakonshëm dhe fuqiplotë i Republikës së Indisë për Republikën e Maqedonisë së Veriut me seli në Sofje, Arun Kumar Sahu.
Nga ministria bëjnë të ditur se në takim janë theksuar marrëdhëniet tradicionalisht të mira mes dy vendeve, si dhe angazhimi i përbashkët për thellimin e mëtejshëm të tyre në nivel dypalësh dhe shumëpalësh.
Me këtë rast, ministri Mucunski dhe ambasadori Sahu shkëmbyen mendime për intensifikimin e dialogut politik përmes vizitave të nivelit të lartë, me theks në zhvillimin e bashkëpunimit ekonomik.
Ambasadori Sahu nga ana tjetër theksoi prioritetin që Qeveria e Indisë i kushton marrëdhënieve me vendin tonë, duke theksuar se misioni i tij do të jetë në forcimin e tregtisë, investimeve, si dhe zhvillimin e bashkëpunimit në fusha si teknologjia dhe turizmi.