Teatri i Qytetit të Gjilanit do të mirëpresë në skenën e tij komedinë e suksesshme të Teatrit ODA, “Shef Lumturimi”, e cila do të shfaqet sonte, më 11 shkurt, duke filluar nga ora 20:00.
Kjo shfaqje trajton me sarkazëm një nga dilemat më të mëdha të kohës moderne – mitin e migrimit drejt vendeve perëndimore, veçanërisht Gjermanisë, si një tokë e premtuar për një jetë më të mirë.
Publiku do të ndjekë historinë e Lumturimit, një punëtor autolarjeje, i cili vendos të ndryshojë rrënjësisht jetën e tij duke u bërë “Shef Lumturimi” në Gjermani.
Autor i tekstit është Lirak Çelaj, ndërsa regjia është e Florent Mehmetit. Roli i personazheve realizohet nga aktorët, përfshirë Arbit Zymerin, Besart Sllamnikun, Florieta Bajraktarin, Lirak Çelajn dhe Nëntor Fetiun.