Publikohet fotoja e Altin Arapajt, 41-vjeçarit shqiptar i cili u ekzekutua me armë zjarri në zonën e Rafinas në Athinë, në një atentat që po hetohet si larje hesapesh mes personash me precedentë penalë. Arapaj u qëllua në fytyrë brenda një vreshti, ku edhe u gjet i pajetë nga autoritetet.
Sipas burimeve të hetimit, viktima kishte arritur të telefononte familjen pak para se të vritej dhe u kishte thënë emrin e personit që dyshohej si autor i ngjarjes. Informacioni i dhënë nga Arapaj është bërë një element i rëndësishëm për hetuesit grekë, të cilët kanë identifikuar një të dyshuar me precedentë për trafik droge.
Edhe Altin Arapaj rezulton me një të kaluar kriminale për vepra të tjera penale, të cilat nuk janë bërë ende publike. Hetuesit dyshojnë se vrasja është pjesë e një konflikti të hershëm kriminal. Fotoja e tij, tashmë e shpërndarë në media, pritet të ndihmojë edhe në mbledhjen e informacioneve të reja nga dëshmitarë apo persona që mund ta kenë njohur.