Shqipëri

Qendra Kërkimore për Vjosën/ Presidenti Meta thirrje qeverisë: Merrni parasysh peticionin e mbi 700 shkencëtarëve botërorë kundër HEC-ve

Zhurnal Ads

Presidenti i Republikës, Ilir Meta këmbëngul që të mos ngrihen hidrocentralet mbi Lumin Vjosa, një nga lumenjtë e paktë ende të egër në Evropë.

Sipas tij, zhvillimi i qëndrueshëm i vendit arrihet vetëm duke rritur vlerat e pasurive të tilla të jashtëzakonshme

Zhvillimi i qëndrueshëm i vendit arrihet vetëm duke rritur vlerat e pasurive të tilla të jashtëzakonshme siç është Lumi Vjosa dhe lugina e tij, duke mbështetur ekonominë e gjelbër, duke zhvilluar agro-turizmin dhe ekoturizmin në zona me vlera të rralla natyrore siç janë ato të Kalivaçit e Poçemit.  E ardhmja e Vjosës nuk mund të jetë kurrësesi shkatërrimi i saj përmes ngritjes së hidrocentaleve, por shpallja si Park Kombëtar, duke sjellë kështu impakt pozitiv dhe zhvillim të qëndrueshëm për zonën dhe komunitetin për sot dhe për gjeneratat e ardhshme”- thekson Presidenti.

Në vijim të Tryezës së Rrumbullakët me temë: ‘‘E ardhmja e Lumit Vjosa – Ndërtim digash apo Park Kombëtar“, të mbajtur dje në Tiranë, nën kujdesin e veçantë të Presidentit në bashkëpunim me Universitetin e Tiranës, kreu i shtetit, Meta përuroi sot Qendrën Ndërkombëtare Shkencore dhe Kërkimore për lumin Vjosa në Tepelenë.

Në ceremoninë e organizuar, merrnin pjesë Kryebashkiaku i Tepelenës, z.Tërmet Peçi, dekani i Fakultetit të Shkencave të Natyrës Prof.Spiro Drushku, profesori i Universitetit të Vjenës, z.Fridrich Schiemer, drejtues vendorë dhe përfaqësues institucionesh e të shoqërisë civile.

Në fjalën e rastit, Presidenti Meta theksoi se mbështet krijimin e një Parku Kombëtar dhe jo ndërtimin e digave mbi lumin Vjosa.

“Është kënaqësi të takohemi së bashku këtu në Tepelenë për një ngjarje mjaft pozitive, përurimin e Qendrës Kërkimore Ndërkombëtare për Vjosën. Hapja e kësaj Qendre Kërkimore ndërkombëtare është bërë e mundur në sajë të bashkëpunimit mes Fakultetit të Shkencave të Natyrës, Universiteti i Tiranës, Universitetit të Vienës dhe Universitetit të Burimeve Natyrore dhe Shkencave të Jetës në Vjenë, Austri (BOKU).

Qëllimi i krijimit të kësaj Qendre është ofrimi i infrastrukturës për zhvillimin e studimeve shkencore në luginën e lumit Vjosa dhe formalizimi i bashkëpunimit mes 3 universiteteve themeluese”, theksoi ai.

Ai tha se shpreson që qeveria shqiptare të marrë në konsideratë peticionin e nënshkruar nga 776 shkencëtarë nga e gjithë bota.

Lumi Vjosa është një pasuri natyrore kombëtare por edhe ndërkombëtare, që ne kemi fatin ta kemi këtu, por që në të njëjtën kohë është i rrezikuar nga planet për ndërtimin e hidroçentraleve të Poçemit dhe Kalivaçit. Edhe pse në kohë të vështira, siç jemi tani në situatën e COVID-19, jemi mbledhur për të diskutuar mbi këtë çështje të rëndësishme në një moment kyç për të ardhmen e luginës së Vjosës – para lëshimit të Deklaratës mjedisore nga Ministria e Mjedisit për hidrocentralin e Kalivaçit.

Unë shpresoj që qeveria të marrë në konsideratë serioze si peticionin e nënshkruar nga 776 shkencëtarë nga e gjithë botë, në mbrojtje të lumit Vjosa, ashtu edhe konkluzionet e nxjerra nga tryeza e djeshme, që iu dorëzuan Presidentit të Republikës dhe që do të dërgohet pranë të gjitha institucioneve kombëtare dhe ndërkombëtare që merren me këtë çështje.

Unë do të vazhdoj të mbetem në mbështetje të nismës në mbrojtje të lumit Vjosa, dhe ky aktivitet, i organizuar në këto dy ditë, është vetëm i pari i shumë të tjerave, që do të organizohen në mbështetje të kësaj kauze, por dhe kauzave të tjera që lidhen me mbrojtjen e mjedisit. 

Uroj dhe shpresoj që tryeza e djeshme dhe hapja sot e Qendrës Kërkimore Ndërkombëtare për Vjosën, të mundësojnë e lehtësojnë dialogun e munguar mes shkencëtarëve, shoqërisë civile dhe institucioneve, duke bërë të mundur që të dëgjohet zëri i shkencëtarëve që studiojnë lumin Vjosa prej vitesh!”- shtoi ai.

Postime të ngjashme

Abuzoi seksualisht me të miturën, arrestohet 23-vjeçari në Durrës

S.B.

Greqi/ Të shtëna me armë zjarri në orët e para të mëngjesit, plagoset i riu shqiptar. Çfarë thotë policia

admin

“Më pak varfëri e vuajtje”, Meta: Përmes arsimimit mund të ndryshojmë të ardhmen e vendit

admin
duke ngarkuar....

This website uses cookies to improve your experience. We'll assume you're ok with this, but you can opt-out if you wish. Accept Read more...