Shkup, 29 shtator – Qyteti i Shkupit shpalli thirrje publike për subvencionimin e biçikletave të blera. Për këtë qëllim nga buxheti i qytetit janë ndarë 2.800.000 denarë, ndërsa subvencioni do të jetë sa gjysma e çmimit të biçikletës, por jo më shumë se 4.000 denarë. Sipas buxhetit të planifikuar do të ketë para për 700 qytetarë, ndërsa thirrja është e hapur deri më 31 tetor, pra deri në shterimin e mjeteve.
Për të rimbursuar një pjesë të shpenzimeve dhe për të vërtetuar se janë plotësuar kushtet për pjesëmarrje në thirrjen publike, aplikanti është i detyruar të paraqesë kërkesën e kompletuar për subvencionim për blerjen e një biçiklete, e cila është publikuar në faqen e internetit të qytetit të Shkupit www.skopje.gov.mk. Duhet t’i bashkëngjitet edhe një deklaratë e noterizuar se aplikanti pranon që të dhënat e tij personale të përdoren ekskluzivisht për pjesëmarrje në këtë thirrje publike, kopje e llogarisë së transakcionit, dhe dëshmi se është blerë një biçikletë e re, duke bashkangjitur llogarinë origjinale fiskale të lëshuar nga 01.01.2024 deri në shterimin e burimeve financiare të synuara.
Një person mund të paraqesë vetëm një kërkesë në thirrjen publike për subvencionim për blerjen e një biçiklete.
Qytetarët dorëzojnë dokumentacionin e nevojshëm në Arkivin e Qytetit të Shkupit në zarf të mbyllur me shënimin “Drejtoria për mbrojtje të mjedisit jetësor – Komisioni për subvencionimin e qytetarëve për blerjen e biçikletave në vitin 2024”, nga e hëna deri të premten nga ora 08:30 deri në 15:00.