Ronen Bar, drejtori i shërbimit të sigurisë së brendshme Shin Bet të Izraelit, ka thënë se do të japë dorëheqje në më pak se dy muaj, pas javësh tensioni me Benjamin Netanyahun, i cili është përpjekur ta shkarkojë atë, duke e çuar Izraelin në prag të një krize kushtetuese.
“Pas 35 vitesh shërbimi, me qëllim që të lejoj një proces të rregullt për emërimin e një pasardhësi të përhershëm dhe për dorëzimin profesional të detyrës, do ta përfundoj rolin tim më 15 qershor 2025”, tha Bar në një aktivitet përkujtimor të Shin Bet të hënën, transmeton Telegrafi.
Beteja midis Netanyahut dhe Bar u intensifikua pasi gjykata supreme bllokoi një vendim të kabinetit për të shkarkuar Bar nga posti i tij – kreu i parë i Shin Bet që u shkarkua.
Netanyahu tha se kishte humbur besimin në aftësinë e Bar për të udhëhequr Shin Bet, dhe e akuzoi atë për konflikt interesi dhe për politizim të agjencisë.
Vendimi i Bar për t’u larguar tani do ta kursejë gjykatën supreme nga marrja e një vendimi potencialisht përçarës dhe të diskutueshëm.
Javën e kaluar, në një deklaratë me betim prej 31 faqesh drejtuar gjykatës supreme, Bar, 59 vjeç, pretendoi se Netanyahu ishte përpjekur ta shkarkonte atë për shkak se refuzonte të zotohej për besnikëri ndaj kryeministrit mbi gjykatat dhe u përpoq ta përdorte agjencinë për të spiunuar protestuesit antiqeveritarë.
Netanyahu paraqiti përgjigjen e tij në gjykatë të dielën, duke hedhur poshtë akuzat e Bar. Ai është referuar vazhdimisht një “deep state” në Izrael, që ai pretendon se kërkon të pengojë udhëheqësit e zgjedhur në mënyrë demokratike dhe të minojë qeveritë e zgjedhura.
Marrëdhënia midis Netanyahut dhe Bar, një ish-ushtar i forcave speciale që mban diploma nga universitetet e Tel Avivit dhe Harvardit, u përkeqësua pas publikimit në mars të një raporti të Shin Bet mbi sulmet e 7 tetorit 2023 nga militantët e Hamasit në Izraelin jugor.
Shërbimi pranoi gabimet, por kritikoi politikat e qeverisë Netanyahu që thanë se i kishin mundësuar Hamasit të ndërtonte forcën e tij në Gaza dhe ta zinte Izraelin në befasi.
Netanyahu nuk ka pranuar kurrë asnjë përgjegjësi për katastrofën më të keqe të sigurisë kombëtare të Izraelit, e cila vrau 1,200 njerëz, kryesisht civilë, dhe çoi në rrëmbimin dhe mbajtjen peng të 251 personave në Gaza.
Tetëmbëdhjetë muaj pas sulmit, shumë nga zyrtarët e lartë në atë kohë kanë dhënë dorëheqje ose janë detyruar të largohen.
Netanyahu duket se nuk ka gjasa të largohet nga pushteti para zgjedhjeve në fund të vitit të ardhshëm, dhe mund të qëndrojë edhe më tej.
Autorizimi i Bar për Shin Bet për të hapur dy hetime ndaj ndihmësve të ngushtë të Netanyahut, përfshirë një për dyshimin e marrjes së pagesave nga Katari për të promovuar interesat e tij në Izrael në të njëjtën kohë që Katari po financonte pjesërisht Hamasin në Gaza, është cituar gjerësisht si një motiv për shkarkimin e tij.
Netanyahu tashmë po përballet me një mori akuzash për korrupsion në gjykatë, dhe kundërshtarët politikë kanë pretenduar se kryeministri donte ta shkarkonte Barin me qëllim sabotimin e hetimeve.
Netanyahu ka mohuar vazhdimisht çdo arsye të papërshtatshme ose të fshehtë për shkarkimin e Barit.
“Deri më sot, arsyeja e shkarkimit tim nuk është e qartë për mua”, shkroi Bar në deklaratën e tij të gjykatës supreme. Por nuk ishte e rrënjosur në ndonjë metrikë profesionale, por nga një pritje e Netanyahut se unë do të isha personalisht besnik ndaj tij”, tha Bar.