Prokuroria e Posaçme Kundër Korrupsionit dhe Krimit të organizuar ka lexuar sot pretencën për dosjen “Sterilizimi”.
SPAK-u kërkoi për ish-zëvendësministrin Klodjan Rrjepaj dhe për biznesmenin Ilir Rrapaj, nga 10 vite burgim, të konvertuar në 6 vite e 8 muaj heqje lirie, duke përfituar nga ulja e 1/3 të dënimit.
Për Marsela Serjanajn, u kërkuan 3 vite dhe 6 muaj burgim, por për shkak të gjykimit të shkurtuar, të konvertohet në 2 vite e 4 muaj heqje lirie.
Për Sajmir Kadiun 3 vite dhe 6 muaj, të konvertuar në 2 vite e 4 muaj burgim.
SPAK-u kërkoi që Petref Mersini të dënohet me 3 vite e 6 muaj burgim, të konvertuar në 2 vite e 4 muaj, por kjo gjë u pezullua. Si përfundim, për Mersinin kërkohen 4 vite shërbim prove.
Për Arben Gjatën u kërkua 1 vit 4 muaj burgim, por dhe për të më pas u procedua me kërkesën për të dhënë 3 vite shërbim prove.
Së fundmi, për Genc Byrazerin dhe Naile Ajazin, u kërkuan 2 vite shërbim prove për secilin.
Në këtë çështje është përfshirë dhe ish-ministri i Shëndetësisë, Ilir Beqaj. Për këtë të fundit, më 28 maj, Gjykata Kundër Korrupsionit dhe Krimit të Organizuar vendosi që ai të gjykohet veçmas me procedurë të zakonshme.
Ish-ministri Beqaj dhe të pandehurit e tjerë akuzohen për disa vepra penale, si korrupsion, shkelje të barazisë në tendera, mashtrim, mosdeklarim dhe fshehje të pasurisë.