Stabiliteti i qeverisë nuk u lëkund, daljet individuale nuk penguan funksionimin institucional!

Shkup, 22 maj – Derisa kishte zëra e shpresa të pa bazuara në fakte që kjo qeveri nuk mund të jetë më stabile pas daljes së Taravarit, gjërat nuk ndodhën kështu. Mbase, i tillë ka qenë plani por ngjanë që u ka dështuar. Pasi ASH nuk është larguar nga pushteti por vetëm një minister i tyre dhe dy zëvëndësministra, ndërkaq, gjithë struktura, funksionarët, eksponentë tjerë të ASH-së vazhdojë të ushtrojnë funksionet e tyre. Përfshirë edhe zëvëndëskryeministrin, Arben Fetai, i cili tha se ASH-ja vazhdon të jetë pjesë e pushtetit. Kjo gjë tregon qartë që kjo qeveri është stabile dhe si e tillë do ta vazhdojë punën, shkruan Zhurnal.

Grupi parlamentar VLEN sinjalizon unitet dhe forcim –

Ndryshe nga zërat dhe spekulimet e ditëve të fundit, realiteti politik në Maqedoninë e Veriut po dëshmon një realitet krejt tjetër, qeveria aktuale mbetet stabile dhe grupi parlamentar VLEN është konsoliduar si një strukturë e unifikuar dhe potencialisht në rritje. Përkundër largimit të ministrit Arben Taravari nga qeveria, zhvillimet pasuese nuk e tronditën shumicën parlamentare, ashtu siç u parashikua në mënyrë të nxituar nga disa qarqe politike.

Është e rëndësishme të theksohet se largimi i Arben Taravarit nga pozita e ministrit të Shëndetësisë nuk u pasua nga një largim i plotë institucional i Aleancës për Shqiptarët nga qeveria. Struktura e gjerë e kësaj partie, funksionarët, drejtuesit lokalë dhe veçanërisht zëvendëskryeministri Arben Fetai kanë konfirmuar vazhdimin e pjesëmarrjes në qeverisje. Kjo është një dëshmi e qartë që dalja e Taravarit ishte më shumë një veprim personal apo taktik, sesa një ndryshim strategjik në linjën politike të ASH-së.

Ndërkohë, formimi i grupit parlamentar VLEN, që aktualisht përbëhet nga 10 deputetë, paraqet një zhvillim domethënës në skenën parlamentare. Ky grup jo vetëm që sinjalizon një unitet të ri ndërmjet përfaqësuesve shqiptarë, por edhe ambicie për të rritur ndikimin dhe peshën vendimmarrëse në Kuvend. Tashmë është e qartë se ky grup nuk është një fragment i përkohshëm, por një bërthamë e qartë politike që do të luajë rol kyç në balancat e ardhshme parlamentare.

Burime nga brenda VLEN-it kanë sinjalizuar se priten aderime të reja, çka mund ta shndërrojë këtë grup në një faktor të domosdoshëm për çdo ekuacion politik të së ardhmes, qoftë në kuadër të stabilitetit të qeverisë aktuale, qoftë në përgatitjen për zgjedhje eventuale.

Zërat që paralajmëronin krizë qeveritare pas largimit të Taravarit duket se nuk ishin gjë tjetër veçse përpjekje për të fabrikuar një krizë që nuk ekzistonte realisht. Në vend të përçarjes, ajo që ndodhi ishte një rikonfigurim i qartë, ku pjesa më e madhe e strukturës së ASH-së zgjodhi të qëndrojë në pushtet, ndërsa pjesa që doli, u përfaqësua nga një individ me qëllime të pashpjeguara deri më sot.

Ky fakt e forcon idenë se koalicioni qeveritar është më stabil se kurrë më parë, ndërsa grupi VLEN që tashmë po shihet si përfaqësues legjitim i interesit politik shqiptar në Kuvend po merr trajtën e një faktori të pashmangshëm për çdo zhvillim politik të qëndrueshëm në vend. Në një moment kur vendi ka përpara sfida të mëdha ekonomike, integruese dhe zhvillimore, stabiliteti qeveritar është kusht për çdo progres. Dhe ky stabilitet nuk vjen vetëm nga numrat në Kuvend, por edhe nga uniteti dhe qëndrueshmëria e grupeve politike, siç po dëshmon aktualisht VLEN.

Kujtojmë që, shqiptarët në Maqedoninë e Veriut, janë të lodhur nga përçarjet dhe zhgënjimet politike të viteve të fundit, po kërkojnë përfaqësues që dinë të mbajnë qëndrim, të ruajnë unitetin dhe të prodhojnë rezultate. Kjo është një mundësi për VLEN jo vetëm për të rritur numrat, por për të dëshmuar lidership dhe koherencë politike në një moment kritik për vendin. /Zhurnal.mk