Strugë, 9 prill – Qytetarët e Strugës sot bënë përgatitjet e fundit për të pritur festën e Fitër Bajramit, ndërsa edhe mërgimtarë të shumtë kanë ardhur në vendlindje. Edhe pse qyteti është i mbushur plot, tregtarët thonë se nuk ka shumë blerje.
“Po, i kemi bërë përgatitjet, si çdo vit edhe këtë vit e presim. Po kanë ardhur shumë mërgimtarë, kanë ardhur ta festojnë Bajramin në vendlindje. Çmimet janë të larta, mundohemi t’i reduktojmë blerjet.”, – tha një qytetar.
“Presim, përgatitemi se çfarë do të bëjmë. Çmimet janë 100 den një kg banane, shumë shtrenjtë është, por duhet të blejmë. Kanë ardhur plot, shoh se rruga 5 kilometra, trafik ka.”, – tha një qytetar tjetër.
“Çmimet janë të shtrenjta, shumë të shtrenjta.”, – u shpreh një qytetar.
“Po, kemi bërë përgatitje, nuset kanë bërë bakllava. Çmimet, goxha lart janë, goxha të ngritura.”, – u shpreh një qytetar tjetër.
“Pazari shkon dobët, s’ka njerëz, ka varfëri, gjendja ekonomike ka ndikuar.”, – tha një tregtar.
“Fitër Bajrami shumë shumë dobët, nuk i kemi rininë, në kurbet ikën shumë dhe Struga u boshatis. Ka rënë puna 80%.”, – u shpreh një tregtar.
Edhe shoqatat bamirëse bënë përgatitjet për t’u dalë në ndihmë nevojtarëve. Nga bamirësit struganë thonë se muaji i ramazanit e shton zemërgjerësinë e struganëve.
“Aktiv kemi qenë pothuajse gjithë muajin, kemi ndihmuar rreth 200 familje me pako ushqimore edhe me mish. Kemi qenë aktiv nëpër farmaci, pagesat e ilaçeve për personat që nuk kanë mundësi, kemi paguar rrymën elektrike. Ky mund të jetë muaji më i suksesshëm, kemi pasur shumë ndihma.”, – theksoi Shkëlzen Ajrullai nga bamirësit struganë.
Çmimet e larta të ushqimeve kanë detyruar qytetarët të reduktojnë çmimet, ndërsa janë rritur edhe rastet e familjeve me gjendje të rënduar ekonomike.