Shkup, 18 qershor – Presidentja Gordana Siljanovska Davkova sot ka realizuar takim me ambasadorin e Hungarisë, Andrash Klajn.
Siç njofton Kabineti presidencial, në takim u përshëndet dialogu intensiv politik dhe u shpreh gatishmëri për bashkëpunim të mëtejshëm të suksesshëm ndërmjet dy vendeve në planin bilateral dhe multilateral.
Presidentja e falenderoi për mbështetjen parimore dhe të vazhdueshme nga Hungaria si mbështetëse e zëshme e integrimeve evropiane të Maqedonisë e cila përfaqëson interesin tonë strategjik dhe kombëtar dhe mirëpriti prioritetet e presidencës hungareze të Bashkimit Evropian dhe njoftimet në lidhje me politikën e zgjerimit, thuhet në njoftim.
Në këtë drejtim, u shkëmbyen informacione për rrjedhën e eurointegrimeve të Maqedonisë, me ç’rast presidentja theksoi pritjen se procesi i anëtarësimit në Bashkimin Evropian do të vlerësohet drejt, në bazë të kritereve të Kopenhagës.
Nga Kabineti i presidentës shtojnë se bashkëbiseduesit kanë biseduar edhe për bashkëpunimin në sferën e arsimit, shkencës, mbrojtjes dhe transportit, me ç’rast presidentja shpreson se në periudhën e ardhshme edhe më tej do të thellohet bashkëpunimi ndërmjet shtetit dhe institucioneve të arsimit të lartë të dy vendeve.
Në takim u theksuan mundësitë për thellimin e bashkëpunimit ekonomik mes dy vendeve dhe rritjen e shkëmbimit tregtar.