Tregtari më i madh i çelikut në Bregun Perëndimor të okupuar, Mahmud el-Veher thotë se ata importojnë nga 130 deri në 150 mijë tonë çelik nga Türkiye në baza vjetore dhe se duhet t’i kalojnë nëpër portet dhe doganat izraelite.
El-Veher në një prononcim për Anadolu foli lidhur me marrëdhëniet tregtare me Türkiyen dhe situatën në Palestinë dhe Bregun Perëndimor.
Veher, një nga tregtarët më të mëdhenj të çelikut në Palestinë dhe që kryen aktivitetet e tij në fusha të ndryshme biznesi, tha se ata kanë fabrikën më të madhe në Bregun Perëndimor dhe se një fabrikë e re është në proces të krijimit.
Ai tha se nga Türkiye importojnë materiale industriale, veçanërisht çelik dhe se vëllimi i tregtisë së tyre po rritet çdo vit. “Çeliku që ne importojmë nga Türkiye në baza vjetore varion nga 130 deri në 150 mijë tonë”, thotë El-Veher.”.
Sipas tij, çeliku i importuar nga Türkiye përdoret më së shumti në tregun e Bregut Perëndimor. “Ne po shisnim edhe në Gaza, por u tërhoqëm nga tregu i Gazës një vit më parë”, tha El-Veher.
– “Arsyeja pse punojmë me Türkiyen është cilësia dhe standardi”
Duke theksuar se janë në vendin e parë në Bregun Perëndimor sa i përket importit të çelikut nga Türkiye, El- Veher shpjegoi se ky vit ishte i ndërlikuar dhe ka patur rënie në shumë fusha. Ai tha se arsyet për të punuar me Türkiyen përfshijnë respektimin e një standardi të caktuar të cilësisë, se produktet janë të cilësisë së lartë dhe çmimet janë të arsyeshme.
Ai vuri në dukje se Türkiye historikisht dhe tradicionalisht është shumë afër palestinezëve dhe nënvizoi besimin që palestinezët kanë krijuar për Türkiyen.
El-Veher deklaroi se ka vëllazëri me Türkiyen dhe jo një marrëdhënie tregtare. “Arsyeja që ne punojmë me Türkiyen është cilësia dhe standardi. Edhe pse jo gjithmonë por edhe çmimi. Ne nuk mund ta gjejmë këtë çmim në Evropë. Ka besim mes nesh dhe kompanive turke”, potencoi ai.
Tregtari palestinez shpjegoi se ata kanë punuar me Türkiyen për 15 vjet. “Standardi (në Türkiye) është në përputhje me standardin izraelit. Çfarëdo që ne importojmë duhet të jetë në përputhje me standardet izraelite dhe palestineze. Edhe prodhuesit turq punojnë sipas këtyre standardeve”, tha El-Veher.
Duke iu referuar faktit se ata blejnë çimento edhe nga Türkiye, Veher tha: “Nuk është vetëm çeliku dhe çimentoja. Ne importojmë nga Türkiye për fabrikat tona industriale. Ne gjithashtu blejmë nga Türkiye materiale industriale, materiale si plastika dhe materialet që përdorim në fabrikë”.
– “Ndërprerja e tregtisë midis Türkiyes dhe Izraelit do të thotë ndërprerje e tregtisë edhe me Palestinën”.
El-Veher thekson se nëse ndërpritet tregtia midis Izraelit dhe Türkiyes, do të preken edhe bizneset e palestinezëve. “Kjo do të thotë ndërprerje të tregtisë midis Türkiyes dhe Palestinës, jo vetëm me Izraelin. Sepse ne nuk kemi porte dhe aeroporte. Kur importojmë produkte nga Türkiye, vijnë përmes Izraelit. Nuk ka rrugë tjetër për të sjellë furnizimet. Kjo do të prekë neve dhe të gjithë palestinezët”, tha ai.
Ai thotë se nëse ndërpritet tregtia mes Izraelit dhe Türkiyes, ata nuk do të mund të blejnë asnjë material nga Türkiye dhe se do të duhet të kërkojnë burime të tjera për produktet. Duke folur për opsione si vendet e Gjirit, Evropa, Egjipti dhe Kina, El-Veher tha se Egjipti nuk i plotëson standardet e kërkuara dhe produktet e të tjerëve janë shumë të kushtueshme.
Tregtari palestinez El-Veher tha se edhe klientët palestinezë do të preken nga kjo sepse përdoruesit do të duhet të paguajnë më shumë për produktet e blera nga vendet e tjera. Sipas tij, nëse tregtia midis Türkiyes dhe Izraelit ndërpritet, biznesmenët në Palestinë do të humbasin kontrollin e tregut.
“Kush do të fillojë të kontrollojë tregun e Bregut Perëndimor në këtë situatë? Kompanitë izraelite. Ata do të fillojnë të kontrollojnë tregun sepse zotërojnë çmimin, produktet. Ata prodhojnë. Ka dy kompani çeliku në Izrael, ata prodhojnë çelik. Ata mund të kontrollojnë lehtësisht tregun palestinez. Pra, do të prekë të gjitha palët”, tha El-Veher.
– “Ne tregtojmë me të gjithë botën përmes Izraelit”
Duke nënvizuar se ata duhet të bëjnë tregti me të gjithë botën përmes Izraelit, El-Veher tha: “Nuk ka rrugë tjetër. Për shembull, të bësh tregti përmes Jordanisë është shumë e kushtueshme. Kostot e transportit, kostot e fluturimit, gjithçka është shumë e lartë. Ne punojmë me ta në baza ditore. Sinqerisht, ditët e fundit, ne kemi nevojë që punëtorët palestinezë të kthehen në punë në Izrael. Sepse ata drejtojnë ekonominë dhe tregun”.
Ai thekson se para fillimit të sulmeve të Izraelit në Gaza, të cilat kanë vazhduar që nga 7 tetori 2023, fabrikat e tyre punonin në tre ndërrime 24 orë në ditë dhe se fabrikat e tyre ishin mbyllur për shkak të kufirit të mbyllur dhe luftës dhe se palestinezët nuk punonin në Izrael.
El-Veher shton se të punosh me Türkiyen do të thotë rritje dhe zhvillim i popullit palestinez. “Ne nuk punojmë vetëm në sektorin e çelikut me Türkiyen. Edhe ushqim, veshmbathje, çelik. Të gjitha këto produkte janë të nevojshme”, thotë ai.
Tregtari palestinez tha se importojnë nga Türkiye dhe jo nga Izraeli. “Ne po rritemi me Türkiyen, po zhvillohemi dita-ditës dhe vit pas viti. Ne po e zgjerojmë biznesin tonë në të gjithë sektorët”, u shpreh El-Veher.
– “Si palestinezë, ne jemi të varur nga Izraeli në porte dhe portet kufitare”
Menaxheri i Grupit të Kompanive Balavi, Abid el-Veher tha se ai ka bërë biznes me turqit që nga viti 2008 dhe se është rehat duke punuar me ta.
“Si palestinezë, ne jemi të varur nga Izraeli në portat kufitare dhe portet. Kur importoj nga Türkiye, i paguaj doganën Izraelit. Ata i transferojnë në administratën palestineze taksat që mbledhin. Prandaj, nëse i ndërprisni marrëdhëniet tregtare me Izraelin, Izraeli nuk do të na lejojë të importojmë nga Türkiye. Në këtë rast do të duhej t’i drejtoheshim Evropës, Rusisë apo Kinës”, tha Abid El-Veher.
Ai tha se ka 16 vite që punon me turqit, ka shumë besim tek ata, turqit e shohin si një prej tyre dhe se e trajtojnë ndryshe nga të gjithë importuesit në Lindjen e Mesme.
Duke thënë se më parë SHBA-ja dhe Izraeli donin të krijonin partneritet me të, por ai e refuzoi, El-Veher tha: “I thashë ministrit palestinez të Ekonomisë se do të bëja tregti vetëm me turqit, nuk i besoj askujt tjetër përveç këtyre njerëzve. Kam shumë vite që punoj me ta, edhe ata kanë besim tek unë”.
El-Veher tha se njerëzit e biznesit me të cilët ai është miq janë të lumtur që bëjnë biznes me turqit. “Turqit i bëjnë gjërat më të lehta kur tregtojnë me palestinezët sesa me pjesën tjetër të botës. Ata i trajtojnë palestinezët më butësisht”, tha ai.