Presidenti i sapozgjedhur i ShBA’së, Donald Trump, pritet të nisë procesin e përzgjedhjes së kabinetit dhe të zyrtarëve të tjerë të lartë të administratës në javët e ardhshme.
Sipas agjencisë Reuters, edhe Richard Grenell pritet të marrë një post në administratën e re republikane. Ai konsiderohet si një kandidat kryesor për rolin e Këshilltarit të Sigurisë Kombëtare, një pozicion që nuk kërkon konfirmimin e Senatit, edhe pse nuk përjashtohet mundësia për një post që kërkon konfirmim nga Senati.
Grenell ka qenë një nga këshilltarët më të afërt të Trumpit për çështjet e politikës së jashtme. Gjatë mandatit të parë katërvjeçar të presidentit të sapozgjedhur, ai ka shërbyer si drejtor i përkohshëm i Inteligjencës Kombëtare dhe ambasador në Gjermani.
Në një takim të shtatorit me presidentin ukrainas Volodymyr Zelenskiy, Trump e përfshiu Grenellin në një takim privat.
Marrëdhëniet e ngushta të Grenellit me liderët e huaj dhe personaliteti i tij shpeshherë i paparashikueshëm e kanë bërë atë një figurë të diskutueshme, çka mund të përbëjë një sfidë të re për konfirmimin e tij nga Senati.
Ndër politikat që ai ka mbështetur është krijimi i një zone autonome në Ukrainën lindore për t’i dhënë fund konfliktit atje, një ide që Kievi e sheh si të papranueshme.
Ndërkohë, sipas “Politico”, Grenell mund të marrë edhe pozitën e Sekretarit amerikan të Shtetit.