Donald Trump ka ftuar disa persona në foltore, derisa po mbante fjalim para mbështetësve të tij në Palm Beach të Floridas.
Kandidati për president të Shteteve të Bashkuara nga radhët e Republikanëve, që shpalli fitoren e tij tha se “të gjithë në sallë janë të veçantë”.
Në anën tjetër, mbështetësit e tij brohorisnin vazhdimisht emrin e miliarderit amerikan Elon Musk, transmeton Telegrafi.
“Ai është një burrë i mrekullueshëm, kemi qëndruar të ulur bashkë këtu sonte. Ai i kaloi dy javë në Filadelfia në pjesë të ndryshme të fushatës në Pensilvani”, shtoi Trump.
Duke shikuar lansimin e raketës së SpaceX, Trump tha se vetëm Elon është i aftë për gjëra të tilla.
“Kjo është arsyeja pse e dua Elonin”, theksoi republikani.
Gjithashtu lavdëroi drejtorin ekzekutiv të Tesla për përdorimin e sistemit të komunikimit Starlink pas uraganit që goditi së fundmi Karolinën e Veriut – një shtet i parashikuar të fitohet nga Trump.