Janë bërë dy orë që kur ka filluar takimi ndërmjet presidentes Vjosa Osmani dhe liderit të LVV-së, Albin Kurti.
Ky takim i cili ka nisur në orën 10, nuk ka përfunduar ende dhe nuk dihen detaje.
Osmani ka ftuar sot për takim krerët e partive politike për të diskutuar rreth ngërçit të tejzgjatur për konstituimin e Kuvendit dhe krijimin e institucioneve të reja.
Të gjithë liderët e partive i janë përgjigjur pozitivisht ftesës së Osmanit për takim.
Pas takimit me kryetarin e Lëvizjes Vetëvendosje Albin Kurti, gjatë ditës do t’i takojë edhe kryetarin e Partisë Demokratike Memli Krasniqi, të Lidhjes Demokratike Lumir Abdixhiku dhe të Aleancës për Ardhmërinë Ramush Haradinaj.
Ftesa e Osmanit për liderët u bë pas publikimit të aktgjykimit të Gjykatës Kushtetuese, që obligoi deputetët të konstiutojnë Kuvendin brenda 30 ditësh.
Që nga e enjtja (26 qershor) kur u publikua aktgjykimi, liderët kanë pasur një takim por nuk janë dakorduar për zgjidhjen.