Shkup, 19 tetor – Sot shënohet 22-vjetori i Lumturimit të Nënë Terezës, bijës së popullit shqiptar që e nderoi kombin tonë në mbarë botën me veprën e saj të jashtëzakonshme humane. Më 19 tetor 2003, Papa Gjon Pali II e shpalli të Lumtur në një ceremoni të veçantë në Vatikan, duke vulosur kështu njohjen botërore të jetës së saj të përkushtuar ndaj më të brishtëve dhe më të harruarve të shoqërisë. Me përulësi dhe forcë shpirtërore, ajo e ngriti flamurin e dashurisë njerëzore përtej kufijve dhe feve.
Nënë Tereza është shembulli më i pastër i dhembshurisë, i besimit dhe i përkushtimit të pashoq ndaj të tjerëve. Në maj të vitit 2011 u mbajt ceremonia e shenjtë e Lumturimit në Bazilikën e Shën Pjetrit në Vatikan, ndërsa më 4 shtator 2016, ajo u shpall Shën Tereza e Kalkutës nga Papa Françesku. Në atë ditë historike, emri i Gonxhe Bojaxhiut u shkrua përjetësisht mes të Shenjtëve të Kishës Katolike, duke e bërë popullin shqiptar krenar për vajzën e tij që u bë dritë për gjithë botën.
E lindur më 26 gusht 1910 në Shkup dhe e ndarë nga jeta më 5 shtator 1997 në Kalkuta të Indisë, Nënë Tereza mbetet një nga figurat më të ndritura të njerëzimit. Për shqiptarët, ajo është një simbol i vërtetë i mirësisë, i sakrificës dhe i vlerave më të larta që mund të bartë një njeri. Në përvjetorin e Lumturimit të saj, le të kujtojmë fjalët që mbeten udhërrëfyes në çdo kohë: “Pa dashuri, jeta është e kotë. Dashuria fillon në shtëpi, dhe nuk është ajo që bëjmë, por sa dashuri vendosim në atë që bëjmë.”