Policia e Kosovës ka realizuar një aksion të gjerë në Gjilan, në kuadër të një plani operativ të posaçëm për ekzekutimin e urdhëresave gjyqësore, që ka përfunduar me arrestimin e 21 personave të shpallur në kërkim nga organet e drejtësisë.
Sipas njoftimit zyrtar, operacionet janë zhvilluar gjatë periudhës 13 maj – 13 gusht 2025, përmes veprimeve të planifikuara dhe të koordinuara në terren nga një task forcë e formuar enkas për këtë qëllim.
Të arrestuarit, të cilët janë dënuar me burgim nga një deri në pesë vjet e gjashtë muaj, akuzohen dhe janë dënuar për vepra të ndryshme penale, përfshirë: • Vrasje në tentativë • Trafikim me njerëz • Shkaktim i rrezikut të përgjithshëm • Blerje, posedim, shpërndarje dhe shitje e paautorizuar e narkotikëve • Bashkësi jashtëmartesore me person nën moshën 16 vjeç • Vjedhje dhe vjedhje të rënda.
Pas përfundimit të procedurave, të gjithë të arrestuarit janë dërguar për vuajtje të dënimit.
Policia e Kosovës ka bërë të ditur se operacionet për kapjen e personave të shpallur në kërkim do të vazhdojnë edhe në ditët në vijim, me qëllim garantimin e rendit dhe sigurisë publike.