Ohër, 12 tetor – Pas 4 vitesh, reparti i fëmijëve në Ohër filloi të punojë përsëri në tre ndërrime, respektivisht 24 orë. Për shkak të mungesës së mjekëve që nga nëntori 2021, reparti funksiononte vetëm si ambulantë e zakonshme për ekzaminime nga e hëna në të premten, nga ora 8:00 deri në ora 20:00.
“Ky problem daton 4 vjet dhe me përpjekje ekstreme dhe disa improvizime, kemi gjetur një zgjidhje”, tha Goran Markoski – Drejtor i Spitalit të Përgjithshëm të Ohrit.
“Aktualisht punojmë në repart me 3 specialiste femra pediatre. Plus për turnin e dytë dhe kujdestari vjen edhe një mjeke-pediatër e punësuar në Qendrën e Shëndetit të Ohrit, dhe gjithashtu angazhohen dy pediatër me kontratë. Këta janë pediatër në pension. Frekuenca e pacientëve është zakonisht rreth 50 ekzaminime në ditë, dhe numri i ekzaminimeve është dukshëm më i lartë në fundjavë”, u shpreh Makedonka Mitreska Naumoska – Shefe e Repartit të Fëmijëve.
Megjithatë, spitali i Ohrit ende përballet me mungesë serioze të stafit në shumë reparte. Ata shpresojnë se nuk do të pësojnë të njëjtin fat si disa spitale të tjera, ku reparte të tëra janë të mbyllura për shkak të mungesës së mjekëve.
“Spitali i Përgjithshëm ka lëshuar 35 specializantë për specializim. Shpresa e plotë është tek ata, se ata do të mbulojnë stafin që mungon dhe se asnjë repart nuk do të mbyllet. Pas sistematizimit në këtë spital mungojnë 86 persona, staf i ndryshëm. Edhe higjienistë, infermierë, infermiere, mjekë. Vetëm për një vit që kryej funksionin e drejtorit, 10 mjekë specialistë kanë dalë në pension dhe nuk ka asnjë punësim në vendin e tyre”, shtoi Goran Markoski – Drejtor i Spitalit të Përgjithshëm të Ohrit.
Në repartin e urologjisë dhe mjekësisë fizike ka vetëm një mjek specialist i cili është gati për të dalë në pension, mjekët dhe infermierët gjithashtu mungojnë në anesteziologji dhe repartin e dermatologjisë. Markoski thotë se deficiti plotësohet në shumicën e rasteve duke angazhuar staf profesional nga spitalet e tjera./Alsat.mk