Drejtori i përgjithshëm i Policisë së Kosovës, Gazmend Hoxha së bashku me zëvendësdrejtorin e përgjithshëm Fehmi HOTI dhe Atasheun Kimberly Riffe, DOJ-ICITAP pranë Ambasadës Amerikane vizituan veriun e vendit, gjegjësisht njësitet policore të Policisë Kufitare dhe ata të rendit publik në Jarinje, Leposaviq, Bërnjak dhe në Banjskë ku më 24 Shtator 2023 u vra rreshteri Afrim Bunjaku.
Sipas një njoftimi për media bëhet e ditur se Hoxha bisedoi me zyrtarët policor të cilët ishin në kryerje të detyrave, duke u interesuar për gjendjen e përgjithshme, sfidat, vështirësitë dhe realizimin e detyrave dhe aktiviteteve policore në atë pjesë të vendit.
Tutje në njoftim bëhet e ditur se delegacioni nga Prishtina, u prit edhe nga zëvendësdrejtori i drejtorisë rajonale policore në Mitrovicën veriore, Veton Elshani, i cili njoftoj eprorët e PK-së rreth gjendjes së përgjithshme të sigurisë në veri të vendit.
Ndërkaq, drejtori i Përgjithshëm i Policisë me bashkëpunëtor vizitoi dhe vuri kurorë me lule, në vendin e rënies së heroit të Kosovës Enver Zumberit.