Shkup, 14 qershor – Në një ceremoni solemne të mbajtur sot në komunën e Çairit, zëvendëskryeministri i Qeverisë së RMV-së, Izet Mexhiti, ndau titullin “Qytetar Nderi” për dy figura të shquara dhe të dashura për shqiptarët kudo – Joseph dhe Shirley DioGuardi.
Ky vlerësim simbolik, por me rëndësi të thellë historike dhe emocionale, u bë si shenjë mirënjohjeje për kontributin e tyre të palëkundur në mbrojtjen dhe promovimin e çështjes shqiptare në arenën ndërkombëtare.
“Kur ne kishim më shumë varre se mikrofonë, ata folën,” tha zëvendëskryeministri Mexhiti në fjalën e tij. “Sot, Joseph dhe Shirley DioGuardi u shpallën qytetarë nderi në Çair, por për ne, ata kanë qenë tanët shumë më herët.”
Joseph DioGuardi, ish-kongresmen amerikan me rrënjë arbëreshe, ishte një nga zërat e parë që e çoi çështjen e Kosovës në Kongresin Amerikan, në një kohë kur shumë të tjerë heshtnin. Ai nuk e mësoi kauzën shqiptare, ai e trashëgoi, dhe e mbrojti me përkushtim, guxim dhe pa interes personal.
Ndërkohë, Shirley Cloyes DioGuardi nuk qëndroi në prapaskenë. Ajo vizitoi kampet e refugjatëve gjatë krizës në Kosovë, dëgjoi dëshmitarët e dhunës dhe spastrimit etnik, përpiloi raporte dhe bëri thirrje botës për drejtësi dhe ndërhyrje. Ajo u bë ura që lidhte shqiptarët me ndërkombëtarët, në një kohë kur zëri ynë nuk dëgjohej.
“Sot nuk i falënderuam. Ne i pranuam. Si tanët. Si pjesë e historisë sonë. Si gurë në themelet e lirisë që kemi sot,” përfundoi Mexhiti.
Titulli “Qytetar Nderi” në Çair është vetëm një simbol, por mesazhi i tij është i thellë: Vlerësimi i sinqertë për dy personalitete që, me zërin e tyre, ndihmuan të ndryshohet rrjedha e historisë shqiptare.
Faleminderit Joseph. Faleminderit Shirley. Nga sot – edhe zyrtarisht qytetarë të nderit në një truall që flet shqip, në Çair. Por përherë – në zemrën tonë.