Sipas rezultateve paraprake zyrtare. Sinisa Karan, kandidati i partisë nacionaliste serbe SNSD në pushtet, ka fituar zgjedhjet e parakohshme për president të Republika Srpska-s (RS), entitetit serb brenda Bosnjë-Hercegovinës, sipas rezultateve paraprake zyrtare.
Karan mori 200 116 vota, ose 50,85%, duke mposhtur kandidatin e opozitës Branko Blanusa, profesor elektronike nga SDS-ja opozitare, i cili siguroi 188 010 vota (47,8%), njoftoi Komisioni Qendror Zgjedhor në Sarajevë pas numërimit të votave në 92,79% të qendrave të votimit.
Karan shihet si aleat i ngushtë i ish-presidentit Milorad Dodik, i cili u shkarkua nga posti për aktivitete separatiste, pas një vendimi gjyqësor, zhvillim që çoi në organizimin e këtyre zgjedhjeve të parakohshme.
Rreth 1,2 milionë persona kishin të drejtë vote, por pjesëmarrja ra në rreth 35%, nga 53% në vitin 2022. Si zgjedhje të parakohshme, mandati i ri presidencial do të zgjasë vetëm një vit, dhe shihet si provë para zgjedhjeve parlamentare dhe presidenciale të vitit 2026.
Karan falënderoi votuesit dhe mentorin e tij politik, Dodik.
“Kur ishte më e vështira, populli serb triumfoi… Faleminderit Milorad Dodik dhe të gjithë deputetëve që mbrojtën Republika Srpska,” tha ai.
Vëzhguesit politikë nuk presin që Karan të vazhdojë axhendën separatiste të Dodikut. Gjatë mandatit të tij, Dodik ka ruajtur marrëdhënie të mira me Moskën dhe pritet të vazhdojë të udhëheqë partinë SNSD, pavarësisht ndalimit për të mbajtur poste publike.