Presidenti i SHBA-së, Donald Trump, po bën një tjetër përpjekje për t’i dhënë fund luftës së Rusisë kundër Ukrainës, ndërsa Uashingtoni ka paraqitur një marrëveshje të re kornizë për paqen – që ka shkaktuar tashmë shqetësim midis zyrtarëve ukrainas.
Një burim në Zyrën e Presidentit tha për “Kyiv Independent” se plani i ri i paqes po hartohej nga i dërguari special i SHBA-së, Steve Witkoff, i cili ka qenë në kontakt të drejtpërdrejtë me Kirill Dmitriev, negociatorin e lartë ekonomik të Rusisë.
Një burim i “Axios” në administratën Trump konfirmoi se SHBA-ja po informonte përfaqësuesit nga Ukraina dhe Evropa lidhur me planin.
Uashingtoni ka sinjalizuar se Ukraina pritet të pranojë marrëveshjen e re kornizë për përfundimin e luftës – që i kërkon Kievit të heqë dorë nga territori dhe sisteme të caktuara armësh.
Propozimet e raportuara përfshijnë gjithashtu zvogëlimin e ushtrisë së Ukrainës, mes lëshimeve të tjera.
Një zyrtar në Zyrën e Presidentit nuk ishte aspak entuziast për planin e mundshëm kur foli për “Kyiv Independent”, duke shtuar se Uashingtoni dukej se po zhvendosej drejt një marrëveshjeje kornize të përafruar me kërkesat e Moskës.
Gjithashtu, sipas burimit, Kremlini kishte ashpërsuar kushtet e tij maksimaliste, duke shfrytëzuar avancimin e forcave ruse në vijën e frontit dhe pasojat e skandalit të madh të korrupsionit që ka përfshirë njerëz të afërt me presidentin Volodymyr Zelensky.
Në sfondin e bisedimeve që po zhvillohen në nivel politik, një rrugë paqeje paralele e udhëhequr nga ushtria duket se po merr formë, gjithashtu.
Sipas “Kyiv Independent”, një delegacion i udhëhequr nga ushtria pritet të udhëtojë në Moskë për të zhvilluar bisedime me zyrtarët rusë.
Bisedimet e fundit të drejtpërdrejta midis Kievit dhe Moskës u zhvilluan gati katër muaj më parë. Qëndrimet themelore të të dyja palëve mbeten të pandryshuara.
Kievi, i mbështetur nga qeveritë evropiane, po bën përpjekje për arritjen e një armëpushimi përgjatë vijës ekzistuese të frontit. Moska, vazhdimisht ka këmbëngulur që Ukraina të lëshojë rajonet lindore të Donetskut dhe Luhanskut.