Ministri i Financave, Hekuran Murati ka bërë të ditur se të hyrat buxhetore të vendit kanë tejkaluar shifrën e 3 miliardë euro.
Murati e ka cilësuar këtë si një moment historik për vendin.
“Për herë të parë në historinë e vendit të hyrat buxhetore kanë tejkaluar shifrën 3 miliardë euro, duke arritur realizim 100% të planifikimit vjetor, ende pa përfunduar viti”, ka shkruar Murati në Facebook.
Ministri ka theksuar se ky buxhet ka mundësuar pagesën e mbi 840 milionë eurove për paga në sektorin publik dhe miliona të tjera për mallra e shërbime.
“Ky buxhet ka mundësuar pagesën e mbi 840 milionë eurove për paga në sektorin publik, rreth 450 milionë euro mallra e shërbime siç janë barnat esenciale apo furnizimet për mbrojtje e siguri, rreth 1.1 miliardë për pensione, shtesa për fëmijë e subvencione në bujqësi, dhe më e rëndësishmja, për herë të parë në historinë e vendit investimet kapitale kanë tejkaluar vlerën mbi 600 milionë euro – shifra e saktë dihet tek pasi të jenë paguar të gjitha faturat që janë pranuar sivjet”, ka shkruar Murati.