Shkup, 25 gusht – Prokuroria Themelore Publike në Shtip sot ka hapur procedurë të menjëhershme kundër një personi të dyshuar për kryerjen e dhunës në stadiumin “Belo Brdo” në Shtip, dje gjatë një ndeshje futbolli midis ekipeve të të rinjve të klubeve të futbollit “Bregallnica” dhe “Shkupi”.
Me veprimet e tij, sipas Prokurorisë, ai ka rrezikuar sigurinë e dy fëmijëve të lindur në vitin 2010, lojtarë të ekipit të “Bregallnicës”, duke u shkaktuar lëndime trupore, dhe përveç kësaj, tek të dëmtuarit, tek pjesa tjetër e publikut të pranishëm dhe në publik ka shkaktuar ndjenjë pasigurie, kërcënimi dhe frike.
“Ngjarja ndodhi në minutën e 89-të të ndeshjes, kur gjyqtari për shkak të një ndërhyrje të gabuar dha kartonin e dytë të verdhë, duke përjashtuar djalin e të dyshuarit i cili luante për ‘Shkupin’. I pakënaqur me vendimin, djali fillimisht u soll në mënyrë josportive dhe u përpoq të përplaset me një nga lojtarët e “Bregallnicës”. Pastaj, babai hyri në fushë dhe filloi të sulmojë dy fëmijët duke u shkaktuar atyre lëndime trupore?! Në fushë hynë edhe persona të tjerë nga publiku, të cilët parandaluan përshkallëzimin e mëtejshëm të ngjarjes”, thuhet në deklaratën e Prokurorisë.
Personi akuzohet për veprën penale “dhunë” sipas nenit 386 paragrafi 4 në lidhje me paragrafin 3 dhe paragrafin 1 të Kodit penal.