Presidenti amerikan, Donald Trump, u bën thirrje republikanëve të Dhomës së Përfaqësuesve të votojnë për publikimin e dosjeve të Epsteinit.
Trump, u ka kërkuar ligjvënësve në partinë e tij të votojnë për publikimin e dosjeve që lidhen me financierin e ndjerë të dënuar për pedofili, Jeffrey Epstein.
Trump shkroi të dielën në mbrëmje se republikanët në Dhomën e Përfaqësuesve duhet ta bëjnë këtë pasi siç ka thënë nuk kanë asgjë për të fshehur.
Ndryshimi i qëndrimit të tij të fundit vjen pas një rrjedhjeje të ngadaltë të dokumenteve të lidhjeve të tij me Epsteinin nga Demokratët e Dhomës së Përfaqësuesve, disa prej të cilave i referohen Trumpit, i cili gjithmonë ka mohuar çdo lidhje me abuzimin seksual dhe trafikimin.
Por detajet e marrëdhënies së tij dhe të figurave të tjera të shquara me Epstein kanë nxitur spekulime dhe kanë çuar në një grindje publike edhe me mbështetësit e tij më të vendosur.
Potencialisht, dhjetëra republikanë kanë sinjalizuar tani se janë të gatshëm të dalin nga radhët dhe të votojnë në favor të një projektligji që do ta detyronte qeverinë amerikane të publikonte të gjitha dokumentet mbi Epstein dhe hetimet penale që ajo mban ndaj tij.
Mbështetësit e projektligjit duket se kanë vota të mjaftueshme që ai të kalojë në Dhomën e Përfaqësuesve këtë javë, megjithëse është e paqartë nëse do të kalojë në Senat, dhomën tjetër të Kongresit Amerikan.
Jeffrey Epstein u gjet i vdekur në qelinë e tij të burgut në Nju Jork në vitin 2019, në atë që një mjek ligjor më vonë e konsideroi vetëvrasje. Ai po mbahej nën akuzat për trafikim seksual, pasi më parë ishte dënuar për nxitje prostitucion me të mitur në vitin 2008. Trump u bën thirrje republikanëve të votojnë për publikimin e dosjeve të Epsteinit.