Gostivar, 26 shtator – Kandidati i pavarur për Kryetar të Komunës së Gostivarit, Visar Ademi në konferencën e sotme për shtyp theksoi se borxhi aktual i vetëqeverisjes lokale tejkalon 11 milionë euro. Ai shprehu gjithashtu dyshime se disa kontrata të lidhura nga administrata komunale nuk janë në përputhje me punët e kryera.
“Sipas të dhënave zyrtare, Komuna e Gostivarit hyn në zgjedhjet lokale me borxhin më të madh në Maqedoninë e Veriut. Vetëm komuna ka 693 milionë denarë (rreth 11,3 milionë euro) dhe së bashku me detyrimet e Ndërmarrjeve Publike Komunale, borxhi total arrin në 25 milionë euro”, tha Ademi.
Në këtë konferencë u prezantuan gjithashtu disa kontrata të dyshimta të nënshkruara nga Komuna, mes tyre, kontrata me kompaninë SS Arkitekt për shërbime projektimi, në vlerë 190.000 euro, dy kontrata me kompaninë AHR Konstrakshen për sanimin e gropave në rrugë, në vlerë totale 380.000 euro, ontrata me kompaninë Stenton Gradba nga Manastiri për sallën e Këshillit Komunal, në vlerë 615.000 euro.
Kandidati i pavarur Visar Ademi, në fjalimin e tij para gazetarëve, theksoi se ky keqmenaxhim financiar ka paralizuar zhvillimin e Gostivarit dhe ka dëmtuar drejtpërdrejt jetën e qytetarëve. Ai prezantoi një plan të detajuar për rimëkëmbjen financiare dhe transformimin e Komunës.
“Plani përfshin: shlyerje graduale të borxheve dhe vendosjen e disiplinës buxhetore, transparencë maksimale dhe llogaridhënie publike, riorganizim institucional për efikasitet dhe profesionalizëm, inovacion digjital dhe model modern të qeverisjes lokale”, tha Ademi.