Shkup, 7 gusht – Banka Popullore do të ngritë nismë për ndryshime të zgjidhjes së tanishme ligjore për llogarinë pagesore me funksione themelore, me të cilat do të mundësohet shfrytëzim i saj më masiv nga ana e qytetarëve për kryerjen e pagesave te të gjitha bankat. Me ndryshimet propozohet heqja e disa prej kufizimeve ekzistuese dhe zgjerim i konsiderueshëm i shërbimeve që qytetarët do të jenë në gjendje të përdorin përmes llogarisë së pagesave me funksione themelore: mundësinë e mbitërheqjeve të lejuara, mundësinë e të paturit të një llogarie pagese me funksione themelore edhe nëse konsumatori ka llogari të tjera, si dhe një grup të zgjeruar shërbimesh falas ose me shpenzime të ulëta që, përveç atyre të brendshme, do të përfshijnë edhe transferta elektronike ndërbankare, lëshimin e një karte debiti dhe deri në katër tërheqje parash në muaj nga bankomatët e bankave të tjera në shumë deri në 2.000 denarë për transaksion.
Siç tha sot guvernatori Trajko Sllaveski, në këtë varg hyjnë edhe shërbime të tjera të cilat edhe deri më tani mund t’i shfrytëzonin qytetarët, gjegjësisht pagesat dhe marrjen e parave të gatshme në bankomatë dhe sportele të bankës, shfrytëzimin e bankave elektronike dhe mobile, si dhe pagesat me kartelë pagesore në vende fizike të shitjes dhe në tregtinë në internet.
“Propozojmë që çmimi i shërbimeve që mund të përdoren përmes llogarisë pagesore me funksione themelore të lidhet me shumën e pagës minimale bruto në vend dhe të përcaktohet në maksimum 0,1 për qind të saj, pra sipas pagës minimale bruto në fuqi për vitin 2025, ajo do të arrijë në 36 denarë në muaj. Për qytetarët që i përkasin grupit të përfituesve ligjorë të të drejtave, përkatësisht të ashtuquajturave kategori të cenueshme të qytetarëve, këto shërbime do të jenë plotësisht falas”, theksoi Sllaveski.
Banka Popullore do të punojë me bankat edhe në vendosjen e rrjetit kombëtar të bankomatëve për qasje më të mirë në para të gatshme në mbarë vendin. Kjo ide, theksoi guvernatori, do të realizohej më së voni deri në fund të vitit 2026.
“Përveç kësaj, Banka Popullore do të propozojë një pako të përshtatur për mikro-tregtarët – më shpesh bizneset familjare me burime të kufizuara – për të inkurajuar përfshirjen financiare dhe digjitalizimin e pagesave. Pritet që kushtet më të favorshme për përdorimin e shërbimeve të pagesave do të jenë në dispozicion të qytetarëve dhe mikro-tregtarëve pas miratimit të ndryshimeve ligjore, pra që ato të jenë në fuqi nga fillimi i vitit 2026”, nënvizoi Sllaveski.